Түркістан облысы, Келес ауданындағы №2 Өзбекәлі Жәнібеков атындағы мектеп-гимназия базасында мемлекет және қоғам қайраткері, этнограф-ғалым, ұлттық руханият жанашыры Өзбекәлі Жәнібековтің 95 жылдығына арналған «Өнегелі өмір — ұрпаққа мұра» атты тағылымы мол салтанатты іс-шара өтті. Тағылым мен тәрбие үндескен маңызды жиын ұлт руханиятын дәріптеу, тарихи тұлғалардың өнегелі жолын жас ұрпақ санасына сіңіру және Ұлттық құрылтайдың негізгі идеологиялық бағыттарын кеңінен насихаттау мақсатында ұйымдастырылды.
Қазіргі таңда Мемлекет басшысы бастамасымен жүзеге асырылып жатқан Ұлттық құрылтай қызметінің басты ұстанымдарының бірі — тарихи жадыны жаңғырту, ұлттық құндылықтарды дәріптеу, ұлттың мәдени кодын сақтау және жастар тәрбиесіне айрықша мән беру. Осы тұрғыдан алғанда, Өзбекәлі Жәнібековтің 95 жылдығына арналған тағылымды шара — қоғамдағы рухани сабақтастықты нығайтып, ұлттық сананы жаңғыртуға бағытталған маңызды мәдени-идеологиялық бастамалардың бірі болды.
Іс-шара барысында мектеп ауласында ұлттық нақыштағы қолөнер шеберлерінің көрмесі ұйымдастырылып, көпшілік назарына қазақ халқының бай мәдени мұрасын танытатын құнды бұйымдар ұсынылды. Көрмеге қойылған ұлттық киім үлгілері, зергерлік әшекейлер, ағаш және теріден жасалған бұйымдар, тұрмыстық заттар мен қолөнер туындылары халқымыздың ғасырлар бойы қалыптасқан эстетикалық талғамы мен рухани дүниесін айшықтай түсті.
Сонымен қатар мектеп оқушыларының шығармашылық жұмыстары мен салған суреттері де қонақтар тарапынан ерекше қызығушылыққа ие болды. Жас ұрпақтың ұлттық құндылықтарға деген құрметін бейнелейтін бұл туындылар олардың ел тарихына, мәдениетіне және рухани мұрасына деген сүйіспеншілігін аңғартты. Мұндай тәрбиелік маңызы зор бастамалар өскелең ұрпақтың бойында отансүйгіштік қасиетті қалыптастырып, тарихи сананы нығайтуға ықпал етеді.
Шара аясында мектеп қабырғасында орналасқан Өзбекәлі Жәнібеков музейінің жұмысы да кеңінен таныстырылды. Музей қорында қоғам қайраткерінің өмір жолынан, еңбек қызметінен сыр шертетін тарихи жәдігерлер мен құнды мұралар сақталған. Атап айтқанда, тұлғаның киген шапаны, тұтынған бұйымдары, қолжазбалары, фотосуреттері мен архивтік құжаттары келушілердің ерекше қызығушылығын тудырды.
Өзбекәлі Жәнібеков — қазақ халқының мәдениеті мен руханиятының дамуына өлшеусіз үлес қосқан тарихи тұлғалардың бірі. Ол ұлттық салт-дәстүрді жаңғырту, тарихи-мәдени ескерткіштерді сақтау, музей ісін дамыту, этнография мен мәдени мұраны зерттеу бағытында елеулі еңбек атқарды. Оның бастамасымен көптеген тарихи жәдігерлер қайта қалпына келтіріліп, ұлттық мәдениетке қатысты құнды дүниелер халық игілігіне айналды.
Ұлт руханиятына қызмет етуді өмірінің басты мақсатына айналдырған қайраткердің өнегелі жолы бүгінгі жастар үшін тағылым мектебі болып саналады. Сондықтан да мұндай іс-шаралардың тәрбиелік және қоғамдық маңызы ерекше. Өйткені тарихи тұлғаларды ұлықтау арқылы жас буынның бойында елдік сана, ұлттық рух және тарихи жауапкершілік қалыптасады.
Салтанатты жиын барысында Өзбекәлі Жәнібековтің ескерткішіне гүл шоқтары қойылып, қайраткер рухына құрмет көрсетілді. Жиналған қауым тұлғаның ел дамуына сіңірген еңбегін еске алып, оның ұлт мүддесі жолындағы қажырлы қызметін жоғары бағалады.
Шараға зиялы қауым өкілдері, ардагерлер, ұстаздар, жастар және аудан тұрғындары қатысып, тұлғаның халқына сіңірген еңбегі туралы естеліктерімен бөлісті. Кездесу барысында ұлттық тәрбие, рухани құндылықтар, тарихи мұраны сақтау және ұрпақ сабақтастығы мәселелері кеңінен қозғалды.
Бүгінде Ұлттық құрылтай алаңында көтеріліп жүрген маңызды мәселелердің бірі — қоғамда ұлттық бірегейлікті нығайту және рухани тұтастықты қалыптастыру. Бұл бағытта тарихи тұлғалардың мұрасын дәріптеу айрықша маңызға ие. Себебі елдің болашағы — өзінің тарихын терең білетін, ұлттық құндылықтарды құрметтейтін және рухани тамырынан ажырамаған саналы ұрпақ тәрбиелеумен тікелей байланысты.
Осы ретте ұйымдастырылған «Өнегелі өмір — ұрпаққа мұра» атты тағылымды шара Ұлттық құрылтайдың рухани жаңғыру, тарихи сананы қалыптастыру және ұлттық мәдени мұраны дәріптеу бағыттарымен толық үндеседі. Мұндай игі бастамалар қоғамдағы рухани сабақтастықты нығайтып қана қоймай, жастарды елжандылыққа, мәдени мұраға құрметпен қарауға тәрбиелейді.
Қазақ халқы үшін руханият — ұлттың темірқазығы. Ал сол руханиятты сақтап, келер ұрпаққа жеткізу жолында аянбай еңбек еткен тұлғалардың өмір жолын насихаттау — бүгінгі қоғамның маңызды міндеттерінің бірі. Өзбекәлі Жәнібековтің өнегелі ғұмыры мен ел үшін атқарған еңбегі — ұлт тарихындағы өшпес мұра.
Тағылымды іс-шара соңында қатысушылар мұндай рухани-мәдени кездесулердің жас ұрпақ тәрбиесіндегі рөлі ерекше екенін атап өтіп, ұлттық құндылықтарды дәріптеуге бағытталған жұмыстар алдағы уақытта да жалғасуы қажеттігін жеткізді. Ұлт руханиятын ұлықтаған мазмұнды жиын көпшілікке үлкен әсер сыйлап, елдік пен бірліктің, тарихи таным мен тағылымның маңызын тағы бір мәрте айқындай түсті.