«Экономика: ішінен қарайық» подкастының кезекті шығарылымы шағын және орта бизнестің ел экономикасындағы рөліне арналды. Бұл тақырып кездейсоқ таңдалмаған. Себебі шағын және орта бизнес – тек табыс көзі ғана емес, қоғамның тұрақтылығы мен ел дамуының негізі.
Спикер мемлекеттік қызмет пен кәсіпкерлік – екі түрлі сала болғанымен, олардың бір-бірімен байланысы бар екенін атап өтті. Оның айтуынша, кәсіп бастау үшін ең алдымен адамның өзіне деген сенімі, идеяға деген құлшынысы мен тұрақты ұмтылысы қажет. Сонымен қатар мемлекеттік қолдаулардың – гранттар мен жеңілдетілген несиелердің – кәсіпкерлерге қаншалықты қолжетімді екенін де талқылады.
Бағдарламада қазіргі жастардың кәсіпке бет бұруы – уақытша тренд пе, әлде саналы таңдау ма деген сұрақ та қозғалды. Жандос мырзаның пайымынша, жастардың арасында бизнеске деген қызығушылық артып келеді. Алайда бұл үрдісті тек табыс көзі ретінде емес, қоғамға пайдалы бағыт ретінде дамыту керек. Қонақтың айтуынша, нағыз кәсіпкер – тек ақша табатын адам емес, ел тағдырына бейжай қарамайтын, қоғамға пайда әкелетін тұлға. Сондықтан кәсіпкерлердің қоғамдық және саяси белсенділігі артуы тиіс.
Сонымен қатар, талқылау барысында бизнестің табысты дамуы үшін нарықтың сұранысын дұрыс бағамдау, бәсекелестерді талдау және жаңашылдыққа бейім болу қажеттігі айтылды. Сарапшының пікірінше, кәсіпкер тек пайда табумен шектелмей, өз қызметінің сапасын үнемі арттырып отыруы керек. Бұл – клиенттердің сенімін сақтаудың және бизнестің ұзақ мерзімді тұрақтылығын қамтамасыз етудің басты жолы. Сондай-ақ, ел экономикасына елеулі үлес қосу үшін кәсіпкерлердің әлеуметтік жауапкершілік жобаларына қатысуы маңызды. Мұндай жобалар қоғамның әл-ауқатын көтеріп қана қоймай, бизнестің беделін арттырады. Кәсіпкерлер қауымдастығының бірігуі, бір-біріне қолдау көрсетуі және ортақ бастамаларды жүзеге асыруы – саланың болашағын айқындайтын негізгі факторлардың бірі.