Мемлекет басшысы жариялаған «Жұмысшылар жылы» аясында еңбек адамдарының мәртебесін арттыру, олардың әлеуметтік жағдайына көңіл бөлу және еңбек ұжымдарының қоғамдағы рөлін күшейту мақсатында Шымкент қалалық Қазақстан халқы Ассамблеясының мүшелері мен этномәдени бірлестіктердің төрағалары «KazFerroGroup» ЖШС кәсіпорнына іссапармен барды.
Іс-шараның негізгі мақсаты — жұмысшы мамандықтарының беделін көтеру, өндірістік саладағы әлеуметтік ахуалмен танысу және еңбек ұжымдарындағы ынтымақ пен келісім мәдениетін дамыту болды. Делегация мүшелері кәсіпорынның өндірістік үдерістерімен, жаңа технологиялық цехтардың жұмыс барысымен, сондай-ақ еңбеккерлерге көрсетіліп жатқан әлеуметтік қолдау шараларымен кеңінен танысты.
Кәсіпорын басшылығы қонақтарға компанияның құрылу тарихы, даму кезеңдері мен соңғы жылдары жүзеге асырылған индустриялық және әлеуметтік жобалар жөнінде жан-жақты ақпарат берді. Әсіресе жұмысшылардың әл-ауқатын жақсарту мақсатында қолға алынған жүйелі бастамаларға ерекше тоқталды.
Атап айтқанда, еңбеккерлердің жалақысын кезең-кезеңімен арттыру, тұрғын үй мәселесін шешу, медициналық қызмет сапасын жақсарту, сондай-ақ мамандардың кәсіби біліктілігін арттыруға бағытталған оқыту бағдарламаларын енгізу сынды бастамалар жүзеге асырылып келеді. Бұл шаралар тек жұмысшылардың тұрмыс деңгейін жақсартып қана қоймай, еңбек өнімділігін арттыруға және кадр тұрақтылығын сақтауға зор ықпал етуде.
Кәсіпорын қызметкерлерімен өткен еркін форматтағы кездесуде ҚХА мүшелері жұмысшылардың пікірлері мен ұсыныстарын тыңдап, өндірістегі нақты мәселелер бойынша өз ойларын ортаға салды. Делегация өндірістік аймақты аралау кезінде жаңа технологиялық жабдықтардың жұмысымен танысып, заманауи өндірістің экологиялық және еңбек қауіпсіздігі стандарттарының сақталуына көз жеткізді.
Кездесу соңында Шымкент қалалық Қазақстан халқы Ассамблеясының өкілдері еңбек тәртібі мен кәсіби шеберлігімен ерекшеленген қызметкерлерге алғыс хаттар табыстап, олардың еңбегіне жоғары баға берді.
Ұйымдастырушылардың айтуынша, мұндай іс-шаралар еңбек адамының қоғамдағы орнын айқындап, жұмысшы мамандығының беделін арттыруға бағытталған. Сонымен қатар, бұл бастама этносаралық татулық пен қоғамдық келісімді нығайтуға, өндірістік ұжымдарда өзара түсіністік пен бірлікті қалыптастыруға өз үлесін қосады.
«Жұмысшылар жылы» — тек еңбек иелерін ұлықтау ғана емес, олардың құқықтарын қорғау, әлеуметтік жағдайын жақсарту және кәсіби дамуына мүмкіндік жасау жолындағы нақты қадам. Шымкент қаласында өткен бұл іссапар ел Президенті бастамашы болған саясаттың өміршеңдігін көрсетіп, еңбек адамына деген құрметтің жаңа деңгейін айқындады.