Шымкент қаласында көлік қозғалысының қауіпсіздігін арттыру және жолдардың ұзақ мерзімге сақталуын қамтамасыз ету мақсатында ірі инфрақұрылымдық жоба қолға алынуда. Бұл бастама аясында ауыр жүк көліктерін бақылайтын заманауи автоматтандырылған өлшеу станциялары орнатылуда. Жобаның жалпы құны 2024–2025 жылдарға 1,021 млрд теңгені құрайды. Мемлекеттік сатып алу рәсімдерінің нәтижесінде мердігер компания ретінде тәжірибесі мол «QSM Engineering» ЖШС анықталды.
Биыл бөлінген 308,6 млн теңге қаражат есебінен алғашқы үш станцияның құрылысы толық аяқталып, қазан айынан бастап іске қосылады деп жоспарлануда. Аталған станциялар қаланың негізгі көлік ағымы көп бағыттарында орналасқан: Шымкент–Сайрам бағытындағы Жібек жолы көшесінде, Бердібек қожа көшесінде және Әмір Темір көшесінде. Бұл жолдардан тәулігіне мыңдаған көлік өтетінін ескерсек, жаңа жүйе шамадан тыс жүктің алдын алуға айтарлықтай үлес қоспақ.
2026 жылға дейін қалада қосымша алты өлшеу станциясын орнату жоспарланып отыр. Жаңа нысандар стратегиялық маңызы бар бағыттарға қойылады. Атап айтқанда, Әл-Фараби көшесінде – Ынтымақ және Исфиджаб тұрғын алаптары маңында, Темірлан тасжолында – әуежайға жақын аумақта, Бәйдібек би даңғылында – Бозарық шағынауданында, А-2 айналма жолында – Ипподром маңында және Шымкент–Ташкент халықаралық тас жолында арнайы орындар белгіленген. Бұл жобаға 712,6 млн теңге қарастырылып отыр.
Мамандардың айтуынша, ауыр жүк көліктерінің шамадан тыс салмақпен жүруі жол төсемінің жылдам бұзылуына әкеледі. Мұндай жағдай тек жол сапасына ғана емес, жалпы көлік қозғалысының қауіпсіздігіне де қауіп төндіреді. Автоматтандырылған өлшеу жүйелері арқылы заң бұзған көліктер автоматты түрде тіркеліп, оларға айыппұл салынады. Бұл өз кезегінде жүргізушілерді тәртіпке шақырып, жолдың сақталуына оң ықпал етеді.
Жоба іске асқаннан кейін қаладағы жолдардың пайдалану мерзімі айтарлықтай ұзаруы күтілуде. Сондай-ақ көлік ағыны реттеліп, жүк тасымалының мәдениеті артады. Бұл бастаманың тағы бір маңызды қыры – экологиялық тиімділік. Себебі жол төсемінің жиі бұзылуы мен қайта-қайта жөндеу жұмыстарының азаюы қоршаған ортаға түсетін салмақты төмендетеді.
Қорыта айтқанда, ауыр жүк көліктеріне бақылауды күшейту – тек жолдарды сақтауға ғана емес, сонымен бірге Шымкенттің жалпы көлік инфрақұрылымын дамытуға бағытталған маңызды қадам.
Толығырақ: YouTube Live
#РСКШЫМКЕНТ #БРИФИНГ