Жыл басынан бері қала аумағында 304 шақырым жолға асфальт төселді. Бұл – бұрынғы жылдармен салыстырғанда едәуір жоғары көрсеткіш. Жол құрылысы барлық аудандарды қамтып отыр. Атап айтқанда:
-
Абай ауданында – 80,4 шақырым,
-
Тұран ауданында – 60,7 шақырым,
-
Әл-Фараби ауданында – 20,1 шақырым,
-
Қаратау ауданында – 78,5 шақырым,
-
Еңбекші ауданында – 64,3 шақырым жолға жаңа асфальт төселді.
Бұл тек сандар емес – мыңдаған тұрғынның күнделікті тұрмысын жеңілдететін, оқушылардың мектепке, жұмысшылардың еңбек орындарына, жедел жәрдемнің және қоғамдық көліктің қауіпсіз қатынауына мүмкіндік беретін маңызды нәтижелер.
Сапалы жол – экономикалық дамудың да басты тетігі. Жаңа жолдар шағын бизнестің дамуына, жүк тасымалының жеделдеуіне, ауыл шаруашылығы өнімдерін орталыққа дер кезінде жеткізуге жағдай жасайды. Сонымен бірге туризм саласына да оң ықпал етпек. Қалаға келген қонақтардың ең алдымен көретіні – жолдардың жай-күйі. Сондықтан бұл бағыттағы жұмыстар елдің абыройы мен беделін арттыруға да қызмет етеді.
Жол құрылысы барысында заманауи технологиялар қолданылып, халықаралық стандарттарға сәйкес асфальт қоспалары төселуде. Мердігер мекемелер сапаға баса назар аударып отыр. Әрбір жаңа жол учаскесі пайдалануға берілгенге дейін арнайы тексерістен өткізіледі.
Жалпы, жыл соңына дейін қала аумағындағы жолдардың жақсы және қанағат жағдайдағы үлесін 90 пайызға жеткізу жоспарланған. Бұл көрсеткішке қол жеткізілсе, көлік қатынасы анағұрлым жеңілдеп, тұрғындардың тұрмыс деңгейіне тікелей әсер етпек.
Қорытындылай келе, шалғайдағы елдімекендерге сапалы жол салу – тек инфрақұрылымды жақсарту ғана емес, ол – халықтың әлеуметтік жағдайын көтеру, қаланың болашағына салынған инвестиция. Бұл жұмыстар алдағы жылдары да жалғасын тауып, қала тұрғындары үшін қолайлы орта қалыптастыруға бағытталмақ.