Түркістан қаласындағы арнайы экономикалық аймақта қазіргі таңда өңір экономикасының дамуына серпін беретін 9 ірі өндірістік жоба жүзеге асырылып жатыр. Бұл жобалар толығымен іске қосылғанда шамамен 2 956 жаңа тұрақты жұмыс орны ашылып, аймақ тұрғындарының әлеуметтік жағдайын жақсартуға елеулі үлес қосады деп күтілуде.
Арнайы экономикалық аймақтың басты мақсаты – өңірдің инвестициялық тартымдылығын арттыру, индустриялық-инновациялық бағыттағы жобаларды шоғырландыру және өндіріс көлемін ұлғайту. Мұнда шетелдік және отандық инвесторлар тарапынан ауқымды қаржы құйылып, жаңа кәсіпорындар бой көтеруде.
Атап айтқанда, іске асырылып жатқан жобалар қатарында тоқыма өнімдерін шығару, құрылыс материалдарын өндіру, ауыл шаруашылығы өнімдерін қайта өңдеу және заманауи логистикалық орталықтар салу бағытындағы кәсіпорындар бар. Бұл өндіріс орындары іске қосылғаннан кейін тек Түркістан қаласының ғана емес, тұтас өңірдің экономикалық әлеуеті арта түспек.
Бүгінгі таңда қаладағы индустриалды аймақта да белсенді жұмыс жүріп жатыр. Мұнда 23 жоба толық іске қосылып, шамамен 961 адам тұрақты жұмыспен қамтылған. Бұл кәсіпорындар өңір экономикасын әртараптандырумен қатар, импортты алмастыру және экспорттық өнім көлемін ұлғайтуға мүмкіндік беріп отыр.
Биылғы жылдың қаңтар-тамыз айларындағы көрсеткіштерге сәйкес, Түркістан қаласында белсенді шағын және орта кәсіпкерлік субъектілерінің саны 22 010 бірлікке жетті. Бұл өткен жылмен салыстырғанда айтарлықтай өсімді көрсетеді. Кәсіпкерлік саласында 34 500-ге жуық адам тұрақты жұмыспен қамтылып, олардың басым бөлігі өндіріс, қызмет көрсету және сауда саласында еңбек етуде.
Қала экономикасындағы шағын және орта бизнестің үлесі де ерекше назар аударарлық. Бүгінде бұл көрсеткіш жалпы өңірлік өнімнің 65-68 пайызын құрап отыр. Бұл Түркістан қаласының экономикасының негізгі қозғаушы күші ретінде кәсіпкерліктің маңыздылығын айқын көрсетеді.
Мемлекет тарапынан кәсіпкерлерге жан-жақты қолдау шаралары жалғасуда. Биылдың өзінде 30 жобаға жалпы сомасы 4,2 млрд теңге көлемінде қаржылай қолдау көрсетілді. Бұл қаражат өндіріс орындарын кеңейтуге, жаңа технологияларды енгізуге және өнім сапасын арттыруға бағытталған.
Сонымен қатар, қалада инфрақұрылымдық қолдау да күшейтіліп келеді. Индустриалды және экономикалық аймақтарда инженерлік-коммуникациялық жүйелер жүргізіліп, кәсіпорындарға қажетті электр энергиясы, су және газ желілері тартылуда. Мұндай қолайлы жағдай инвесторлар үшін тартымды орта қалыптастырып, жаңа жобалардың жүзеге асырылуына жол ашуда.
Экономикалық аймақта құрылысы жүріп жатқан өндіріс орындарының қатарында өңдеуші өнеркәсіп, тамақ өндірісі және жеңіл өнеркәсіп бағытындағы кәсіпорындар бар. Әсіресе, тоқыма өнімдерін шығару және экспорттау саласы айрықша қарқынмен дамып келеді. Бұл өз кезегінде «Made in Turkistan» брендімен отандық өнімдердің халықаралық нарыққа шығуына мүмкіндік береді.
Түркістан қаласының әлеуметтік-экономикалық даму көрсеткіштері жылдан жылға тұрақты өсіп келеді. Мемлекет басшысының тапсырмасына сәйкес, өңірде кәсіпкерлікті қолдау және жаңа өндіріс орындарын ашу басым бағыттардың бірі болып отыр. Осы мақсатта арнайы экономикалық аймақ пен индустриалды аймақтардың әлеуеті тиімді пайдаланылуда.
Жалпы алғанда, Түркістандағы экономикалық аймақ – бұл өңірдің жаңа индустриалдық келбетін айқындайтын, заманауи технологиялар мен инновациялық өндірістер шоғырланған алаң. Мұнда құрылысы жүріп жатқан 9 кәсіпорын іске қосылғанда, аймақтың өнеркәсіп өнім көлемі артып, жергілікті бюджеттің кіріс бөлігі де ұлғаяды.
Айта кетейік, алдағы жылдары Түркістан қаласында тағы бірнеше жаңа жобаларды жүзеге асыру жоспарланып отыр. Бұл бағыттағы жұмыстар инвесторлармен өзара тиімді әріптестік негізінде жалғасады. Нәтижесінде, қала тұрғындары үшін жаңа жұмыс орындары ашылып, өңірдің экономикалық өсімі одан әрі тұрақты болмақ.
Түркістан облысының Өңірлік коммуникациялар қызметі