▪️Түркістан облысы, Сарыағаш ауданына қарасты Жібек жолы ауылдық округіндегі Жібек жолы елді мекенінде ауыз су құбырының құрылысы қарқынды жүргізіліп жатыр. Бұл — өңір тұрғындарының өмір сапасын арттыруға бағытталған ең маңызды әлеуметтік жобалардың бірі.
▪️Соңғы жылдары Сарыағаш ауданында инфрақұрылымдық жобалар ерекше қарқынмен жүзеге асырылып келеді. Әсіресе, тұрғындарды сапалы ауыз сумен қамту мәселесі аудан әкімдігінің басты назарында. Осы бағытта атқарылып жатқан жұмыстардың бірі — Жібек жолы елді мекеніне таза ауыз су жеткізуге арналған нысан құрылысы.
▪️Жоба бойынша елді мекенді Р-1 каналынан тартылатын магистральды суағар жүйесіне қосу көзделген. Бұл өз кезегінде ауыл тұрғындарының көпжылдық мәселесін шешіп, халықтың тұрмыс деңгейін айтарлықтай жақсартуға мүмкіндік береді. Бұған дейін ауыл халқы ауыз суды тасымалдап немесе құдық суын пайдаланып келген болатын. Енді заманауи су жүйесінің іске қосылуымен бұл қиындықтар түбегейлі шешімін таппақ.
▪️Аталған нысанның құрылыс жұмыстарын ауданның тұрғын үй-коммуналдық шаруашылық, жолаушылар көлігі және автомобиль жолдары бөлімі тапсырыс беруші ретінде ұйымдастырса, мердігер мекеме ретінде «FS Development Group» жауапкершілігі шектеулі серіктестігі қызмет атқаруда. Мердігер компанияның мәліметінше, жобаның жалпы ұзындығы 91 шақырымды құрайды. Оның ішінде негізгі магистральды желі, тарату жүйесі және қосалқы инженерлік инфрақұрылым түгел қамтылған.
▪️Қазіргі таңда құрылыс жұмыстарының негізгі бөлігі орындалды. Атап айтқанда, елді мекеннің ішкі көшелеріне ауыз су құбырлары толығымен тартылып, Р-1 магистралдық құбырына қосу жұмыстары жүргізілуде. Сонымен қатар, су қоймасы мен қорғау пункті салынып, қажетті көлемдегі су резервуарлары мен насос станциялары орнатылған.
▪️Мердігер мекеме өкілдерінің айтуынша, жобаның құрылыс-монтаж жұмыстарының орындалу деңгейі 95 пайызға жетті. Қалған жұмыстар күз айының соңына дейін толық аяқталып, нысан пайдалануға беріледі деп күтілуде.
▪️Жоба іске қосылғаннан кейін Жібек жолы ауылдық округіндегі 6 мыңнан астам тұрғын сапалы ауыз суға қол жеткізеді. Бұл – ауыл халқы үшін үлкен әлеуметтік жетістік. Ауыз су жүйесі тәулігіне 24 сағат үздіксіз жұмыс істеуге бейімделген және қысым реттегіш автоматты жүйемен жабдықталған.
▪️Сарыағаш ауданының әкімі Арман Абдуллаев нысанның құрылыс барысын бірнеше рет арнайы барып тексеріп, мердігерлерге жұмысты сапалы әрі мерзімінде аяқтауды тапсырды. Әкімнің айтуынша, бұл жобаның маңызы тек инженерлік инфрақұрылыммен шектелмейді. Ол ауылдың әлеуметтік жағдайын, экологиялық ахуалын және тұрмыс сапасын жақсартуға тікелей әсер ететін кешенді бастама болып саналады.
▪️«Біздің басты мақсатымыз – аудан тұрғындарын 100 пайыз таза ауыз сумен қамту. Бұл бағыттағы жұмыстар кезең-кезеңімен жүзеге асып жатыр. Жібек жолы елді мекеніндегі жоба соның айқын дәлелі. Аталған нысан пайдалануға берілсе, ауыл халқының көптен күткен тілегі орындалады», – деді аудан әкімі Арман Абдуллаев.
▪️Айта кетейік, Сарыағаш ауданында соңғы үш жылда 30-дан астам елді мекенде ауыз су жүйелерін қайта жаңарту немесе жаңа желілер тарту жұмыстары жүргізілді. Соның нәтижесінде бүгінгі таңда аудан халқының 85 пайызы орталықтандырылған ауыз су жүйесіне қосылған. Ал 2026 жылға дейін бұл көрсеткішті 100 пайызға жеткізу көзделуде.
▪️Ауыз су саласындағы жобалар «Ауыз су – 2025» өңірлік бағдарламасы аясында жүзеге асырылуда. Бағдарлама шеңберінде облыстың өзге де елді мекендерінде су құбырларын тарту, су қоймаларын жаңғырту, сүзгі станцияларын орнату және тозығы жеткен жүйелерді алмастыру сияқты ірі жұмыстар жүргізіліп жатыр.
▪️Түркістан облысы әкімінің тапсырмасымен су ресурстарын тиімді пайдалану және экологиялық тепе-теңдікті сақтау бағытында жаңа технологиялар енгізілуде. Құрылыс барысында энергия үнемдейтін заманауи сорғы жабдықтары орнатылып, автоматты бақылау жүйесі іске қосылады. Бұл өз кезегінде су ысырабын азайтып, техникалық қызмет көрсету шығындарын төмендетеді.
▪️Болашақта Жібек жолы елді мекеніндегі ауыз су нысаны ауданның көршілес ауылдарын да қамтитын бірыңғай су тарату жүйесінің құрамдас бөлігіне айналады деп жоспарлануда. Осылайша, Сарыағаш өңірі бойынша ауыз су инфрақұрылымы толық жаңарып, тұрғындар таза әрі үздіксіз суға қол жеткізетін болады.
▪️Халық арасында жүргізілген әлеуметтік сауалнама нәтижесінде де тұрғындардың басым көпшілігі ауыз су мәселесінің шешілуін аудан дамуының басты жетістігі ретінде бағалап отыр. Көптеген тұрғындар құрылыс жұмыстарының қарқынына оң баға беріп, жергілікті билікке алғыстарын білдіруде.
▪️Жоба толық аяқталған соң нысанның техникалық қабылдау жұмыстары өткізіліп, пайдалануға ресми түрде тапсырылмақ. Нысанның құрылыс сапасы облыстық және аудандық техникалық бақылау бөлімдерінің тұрақты бақылауында.
Түркістан облысы әкімінің баспасөз қызметі