Шымкент қаласында медицина мамандарының кәсіби шеберлігі мен заманауи технологияларды тиімді қолдануының нәтижесінде 60 жастағы азаматтың өмірі аман қалды. Бұл жағдай дәрігерлердің жедел әрекет ете алу қабілеті мен адамның өмірін сақтап қалуға деген жоғары жауапкершілігінің тағы бір дәлелі болды.
2024 жылғы 15 қазан күні №2 қалалық ауруханаға жедел жәрдем қызметі аса ауыр халдегі ер адамды жеткізді. Науқас ес-түссіз күйде болып, оның жағдайы өміріне қауіп төндіретін деңгейде бағаланды. Дәрігерлер алғашқы тексеріс барысында бірден бірнеше ауыр диагноз қойды: жедел панкреатит, пневмония, қант диабетінің асқынуы және тыныс жетіспеушілігі. Науқас кома жағдайында болғандықтан, дереу жансақтау бөліміне жатқызылып, интенсивті терапия басталды.
Аурухана базасында бейінді мамандардан мультидисциплинарлық консилиум құрылып, әр сала дәрігері науқастың жағдайын тұрақтандыру үшін жеке ем жоспарын ұсынды. Дегенмен, 16 қазан күні сағат 23:30 шамасында науқаста клиникалық өлім тіркелді. Жүрек соғысы толық тоқтап, науқастың өміріне нақты қауіп төнді. Бұл сәтте әрбір секунд шешуші рөл атқарды.
Реанимациялық топ дереу жүрекке жабық массаж жасап, өкпені жасанды желдету құрылғысын қосу арқылы кешенді шараларды бастады. Дәрігерлердің кәсіби әрі үйлесімді жұмысының арқасында жүрек соғысы небәрі төрт минуттың ішінде қалпына келтірілді. Одан кейінгі кезеңде ағзадағы уытты заттарды шығаруға және ішкі мүшелердің жұмысын жақсартуға бағытталған «Призмафлекс» аппараты көмегімен гемодиафильтрация жүргізілді.
Тағы бірнеше күндік бақылау мен қарқынды ем нәтижесінде науқас есін жиып, өмірлік көрсеткіштері тұрақтады. Қазіргі уақытта оның жағдайы жақсы, палатаға ауыстырылған. Дәрігерлердің айтуынша, жақын күндері науқас толық сауығып, үйіне шығарылмақ.
Бұл оқиға – Шымкент қаласындағы медициналық жүйенің дамығанын, медицина қызметкерлерінің жоғары дайындықта екенін көрсететін айқын мысал. Заманауи құрал-жабдықтардың қолжетімділігі мен дәрігерлердің үздіксіз еңбегі көптеген азаматтарға жаңа өмір сыйлап отыр.
Толығырақ ақпаратты төмендегі сілтеме арқылы көруге болады:
#РСКШЫМКЕНТ #БРИФИНГ