Шымкент қаласының №1 қалалық клиникалық ауруханасында 241-ші туыстық бүйрек ауыстыру операциясы сәтті жүргізілді. Осы жолғы ота ерекше мәнге ие болды, өйткені дәрігерлер туған ағасының бүйрегін інісіне трансплантациялады. Науқас 2024 жылдан бері созылмалы бүйрек жеткіліксіздігімен есепте тұрған, ал 2025 жылдан бастап гемодиализ аппаратына тәуелді болып келген. Барлық қажетті медициналық тексерулер мен заңды рәсімдер толық орындалып, ота 2025 жылғы 5 қарашада жүргізілді. Қазіргі уақытта донор мен реципиенттің жағдайы тұрақты, отадан кейінгі емдік шаралар бекітілген хаттамаға сәйкес жүргізілуде, медициналық персоналдың бақылауында.
Бүйрек трансплантациясы – науқастың өмір сапасын елеулі түрде жақсартып, қалыпты өмірге оралуына мүмкіндік беретін жоғары технологиялық медициналық процедуралардың бірі. Шымкентте бүгінге дейін 241 бүйрек, сонымен қатар 33 бауыр алмастыру операциясы жасалған. Бұл көрсеткіш өңірде трансплантологияның дамып келе жатқанын, жоғары мамандандырылған медициналық көмектің жергілікті деңгейде қолжетімді екенін дәлелдейді.
Ағымдағы жылдың алғашқы 10 айында қаладағы медициналық ұйымдарда 1 089 жоғары технологиялық медициналық көмек көрсетілді, соның ішінде 3 жүрек трансплантациясы сәтті жүргізілген. Бұл деректер Шымкент қаласының медициналық саласында жаңа технологияларды енгізу мен жоғары стандартты хирургиялық қызмет көрсетудің артып келе жатқанын айқын көрсетеді.
Онкологиялық қызмет саласында бірегей жетістік
2025 жылғы қыркүйек айында Шымкенттегі көпбейінді аурухананың онкологиялық орталығында елімізде алғаш рет күрделі операция – кеңірдек бифуркациясын резекциялау және жаңа бифуркация қалыптастыру – сәтті орындалды. Бұл операция 37 жастағы науқасқа жасалды және торакальды онкохирургиядағы ең күрделі әрі жоғары деңгейлі араласулардың бірі болып саналады. Қазақстанда мұндай тәжірибе бұрын болмағандықтан, бұл медициналық жетістік ерекше маңызға ие.
Осындай жоғары технологиялық ота түрлерін енгізу мақсатында Шымкенттің онкохирургтары Ресей Федерациясының жетекші ғылыми және клиникалық орталықтарында, сондай-ақ Литва Денсаулық ғылымдары университетінде (LSMU, Каунас университеттік клиникасы) арнайы тағылымдамадан өтіп, 33 медицина маманы кәсіби біліктілігін арттырды. Бұл тәжірибе күрделі хирургиялық араласуларды орындауда шетелдік озық әдістерді қолдануға мүмкіндік береді.
Жоғары технологиялық медициналық қызмет көрсетудегі бұл жетістіктер Шымкенттің медициналық инфрақұрылымының тұрақты дамуын көрсетеді. Қалалық ауруханаларда күрделі ота түрлері кеңінен қолжетімді болып, мамандардың кәсіби деңгейі жоғарылады, ал тұрғындарға сапалы және заманауи медициналық көмек көрсетілуге мүмкіндік туды. Осылайша, Шымкент өңірлік деңгейде жоғары технологиялық медициналық қызмет көрсетудің үлгісіне айналып отыр.
Толығырақ: https://www.youtube.com/live/tdctUfs06IU?si=S4aLAUl9S6s-D-4L
#РСКШЫМКЕНТ #БРИФИНГ