Түркістан қаласында жасыл экономика қағидаттарын енгізу және энергия тиімділігін арттыру бағытындағы жұмыстар жүйелі түрде жүзеге асырылуда. Соңғы жылдары қаланың инженерлік инфрақұрылымы кезең-кезеңімен жаңартылып, қоршаған ортаға түсетін жүктемені азайтуға, энергия тұтынуды оңтайландыруға бағытталған бастамалар сәтті іске асырылуда. Соның ішінде көше жарықтандыру жүйесін жаңғырту – қаланың экологиялық және әлеуметтік қауіпсіздігін қамтамасыз ететін маңызды бағыттардың бірі.
Бүгінгі таңда Түркістан қаласы аумағында 37 302 жарықтандыру нүктесі жұмыс істейді. Бұл шамдардың барлығы энергия үнемдейтін заманауи жарық көздерімен жабдықталған. Ескі, тиімсіз шамдар кезең-кезеңімен жаңа LED-жүйелерге ауыстырылып, электр энергиясының шығынын айтарлықтай азайтуға қол жеткізілуде. Қаланың ішкі орам көшелерінде биылдың өзінде 450 жаңа жарық шамы орнатылды. Бұл – қаланың жасыл экономикаға көшу стратегиясының нақты нәтижесі.
Қазіргі уақытта қаладағы 30 көше бойынша жарықтандыру желісін жүргізу және жаңа электр шамдарын орнату жұмыстары қарқынды жүріп жатыр. Мақсат – тұрғындардың қауіпсіз қозғалуына жағдай жасау, көше инфрақұрылымын жаңарту, сондай-ақ энергия тиімді жүйелерді толық енгізу арқылы қоршаған ортаға келетін әсерді азайту.
Көшелерді жарықтандыру жүйесі толықтай автоматтандырылған басқару жүйесіне қосылған. Бұл шамдардың артық жұмыс істеуін болдырмай, энергия тұтынуды нақты реттеуге мүмкіндік береді. Жүйе бойынша жарықтандыру желісі күн сайын 17:00-де қосылып, 07:00-де автоматты түрде өшіріледі. Мұндай тәсіл энергия үнемдеумен қатар, қаладағы түнгі қауіпсіздікті қамтамасыз етеді және қоғамдық тәртіптің сақталуына септігін тигізеді.
Жұмыстардың маңызды бөлігі – тозығы жеткен электр бағаналарын ауыстыру. Қаланың инженерлік инфрақұрылымын жаңарту аясында ескі тіректер жаңа, экологиялық талаптарға сай әрі ұзақ мерзімге шыдайтын материалдармен алмастырылуда. Бұл электр желілерінің үзіліссіз жұмыс істеуін қамтамасыз етеді және қауіпсіздік деңгейін арттырады.
Жасыл экономика қағидаттары бойынша, заманауи LED-жарықтандыру шамдары электр энергиясын 70–80 пайызға дейін үнемдейді. Бұл тек экологиялық тиімділік қана емес, сонымен бірге қалалық бюджеттің үнемделуіне де оң әсер етеді. Үнемделген қаржы келешекте қала инфрақұрылымын дамытуға, жаңа жобаларды жүзеге асыруға бағытталуда.
Түркістан қаласы соңғы жылдары қарқынды дамып, тұрғындар саны артып келе жатқан мегаполиске айналды. Мұндай жағдайда энергия тиімді инфрақұрылым құру – қаланың стратегиялық мақсаты. Халықтың әл-ауқатын арттырумен қатар, энергияны үнемдеу және қоршаған ортаны қорғау бойынша әлемдік стандарттарға сай дамуға басымдық берілуде.
Алдағы уақытта қалада қосымша жарықтандыру желілерін тарту, экологиялық таза энергия көздерін пайдалану, «ақылды қала» жүйесіне бейімделген жарықтандыру технологияларын енгізу жоспарланған. Сонымен қатар энергия тиімді лампаларды 100 пайыз орнату, көше шамдарын автоматтандыру деңгейін арттыру және энергия тұтынуды цифрлық форматта бақылау жұмыстары да жалғасады.
Түркістан қаласының көшелерін жарықтандыруды жаңғырту – тек инфрақұрылымдық жоба емес. Бұл – қала экологиясын жақсартуға, тұрғындардың қауіпсіздігі мен өмір сүру сапасын арттыруға, энергия ресурстарын тиімді пайдалануға бағытталған кешенді шара. Осындай жұмыстардың нәтижесінде Түркістан жасыл экономикаға көшу бойынша елімізде алдыңғы қатарлы қалалардың біріне айналып келеді.