Түркістан облысында тұрғындарды ауыз сумен, табиғи газбен, электр қуатымен және сапалы жол инфрақұрылымымен қамтамасыз ету бағытында кешенді жұмыстар жүйелі түрде жүргізіліп келеді. Бұл туралы Орталық коммуникациялар қызметінде өткен баспасөз мәслихатында облыс әкімі Нұралхан Көшеров мәлімдеді.
Облыс басшысы өз сөзінде Мемлекет басшысы Қасым-Жомарт Тоқаевтың ауылды дамыту жөніндегі тапсырмалары өңірде табанды түрде жүзеге асырылып жатқанын атап өтті.
– Президентіміз халқымыздың тамыры – ауылда екенін ерекше атап өтті. Түркістан облысының 75 пайызы ауылдық жерлерде тұрады. Сондықтан ауылдарды инфрақұрылыммен қамтамасыз ету – біздің жұмыстың басты бағыты, – деді Нұралхан Көшеров.
Ауыз сумен қамту – 100 пайызға жақындап келеді
Қазіргі таңда облыстағы 2,1 млн тұрғынның немесе 98,5%-ының үйіне орталықтандырылған ауыз су жүйесі тартылған. Бұл – республика бойынша ең жоғары көрсеткіштердің бірі. 763 елді мекеннің 30-ында биыл жаңадан ауыз су жүйелерінің құрылысы аяқталып, пайдалануға беріледі. Сонымен қатар 11 елді мекенде тозған су жүйелері толық жаңартылуда.
Жыл соңына дейін халықты таза ауыз сумен қамту деңгейін 100%-ға жеткізу жоспарланған. Ал ауыз суды кестемен тұтынатын 192 елді мекеннің мәселесін үш жылдың ішінде толық шешу көзделіп отыр. Бұл жұмыстар өңірдегі өмір сапасын айтарлықтай жақсартып, су ресурстарын тиімді басқаруға мүмкіндік береді.
Газдандыру қарқыны артып келеді
Облыстағы 1 млн 834 мың тұрғын немесе 85,5%-ы табиғи газбен қамтылған. Барлығы 563 елді мекенге газ тартылған. Биыл қосымша 37 елді мекеннің газ жүйесі салынып, нәтижесінде қамту деңгейі 600 ауылға немесе 88,9%-ға жетпек. Газдандыру жұмыстарының қарқынды жүргізілуі экологияны жақсартып, көмірді пайдалануды азайту арқылы ауаның ластануын төмендетуге ықпал етеді.
Электр желілері жаңартылып жатыр
Соңғы екі жылда облыстың 66 елді мекенінде электр желілері жаңғыртылып, тұрғындар сапалы және тұрақты қуат көзімен қамтамасыз етілді. Заманауи электр инфрақұрылымын дамыту – энергия тиімділігі мен тұтыну тұрақтылығын арттырудың басты тетігі. Бұл бағыттағы жұмыстар тұрғындардың тұрмыс сапасын арттыруға елеулі әсер етуде.
Жол инфрақұрылымы кеңейіп, сапасы артуда
2024 жылы Түркістан облысында 289 инфрақұрылым нысанында, яғни 1 236 шақырым автожолда құрылыс-жөндеу жұмыстары жүргізілуде. Жыл қорытындысымен 951,4 шақырым жол пайдалануға беріліп, жолдардың нормативті жағдайы 94,7%-ға жеткізіледі. Бұл өңірдегі көлік қатынасын жеңілдетіп, елді мекендер арасындағы байланысты күшейтіп, экономикалық белсенділікті арттыруға мүмкіндік береді.
Тұрақты даму жолындағы жүйелі жұмыстар
Облыс әкімінің айтуынша, инфрақұрылымдық жобалар тек тұрғындардың жағдайын жақсартуға ғана емес, өңірдің жалпы экономикалық дамуына серпін беруде. Сумен, газбен, электрмен қамтамасыз ету – әлеуметтік тұрақтылықтың басты кепілі. Ал жолдардың сапасын арттыру ауыл шаруашылығы, кәсіпкерлік және туризм салаларындағы мүмкіндіктерді кеңейтеді.
Түркістан облысында қолға алынған бұл жұмыстар алдағы уақытта да жалғасын тауып, өңірдің әлеуметтік-экономикалық дамуына зор үлес қоспақ. Облыс басшылығы халықтың өмір сапасын арттыруға бағытталған стратегиялық міндеттерді кезең-кезеңімен орындауды көздеп отыр.