Қазақстан Республикасында Мемлекет басшысы Қасым-Жомарт Тоқаевтың бастамасымен экономиканы әртараптандыру, өндірістік әлеуетті арттыру және қоршаған ортаны қорғау бағытында жүйелі саясат жүргізілуде. Бұл саясаттың негізгі басымдықтарының бірі – жасыл экономика қағидаттарын кезең-кезеңімен енгізу, табиғи және өндірістік ресурстарды ұтымды пайдалану, сондай-ақ экологиялық қауіпсіздікті қамтамасыз ету. Осы бағыттағы нақты жобалар еліміздің өңірлерінде, оның ішінде Түркістан облысында да белсенді жүзеге асырылып келеді.
Түркістан облысы – ауыл шаруашылығы саласы жоғары деңгейде дамыған өңірлердің бірі. Республика көлемінде ауыл шаруашылығы өнімдерін өндіру көрсеткіштері бойынша көш бастап тұрған өңірде шикізатты тек бастапқы күйінде өткізу емес, оны терең өңдеу арқылы қосылған құны жоғары өнім шығару мәселесіне ерекше көңіл бөлінуде. Осы тұрғыда Ордабасы ауданында іске асырылып жатқан ірі қара мал сүйектерін қайта өңдеу арқылы желатин және пептон өнімдерін өндіруге бағытталған «HUATING BIOTECHNOLOGY Co., LTD» жауапкершілігі шектеулі серіктестігінің жобасы өңір үшін стратегиялық маңызы бар бастама болып табылады.
Аталған жоба жасыл экономика қағидаттарына толықтай сәйкес келеді. Себебі өндірісте ауыл шаруашылығы саласында қалдық ретінде қарастырылатын ірі қара мал сүйектері қайта өңделіп, пайдалы әрі сұранысқа ие биотехнологиялық өнімдер алынады. Бұл, біріншіден, қоршаған ортаға түсетін экологиялық жүктемені азайтса, екіншіден, қалдықсыз немесе аз қалдықты өндіріс мәдениетін қалыптастыруға мүмкіндік береді. Табиғи ресурстарды тиімді пайдалану мен экологиялық жауапкершілік жобаның негізгі бағыттарының бірі болып отыр.
Жобаның жүзеге асу барысы облыс әкімдігі тарапынан тұрақты түрде бақылауда. Осыған орай Түркістан облысы әкімінің орынбасары Нұрбол Тұрашбеков Ордабасы ауданында инвестор компания басшылығымен арнайы кездесу өткізіп, жобаны іске асыруға қатысты өзекті мәселелерді талқылады. Кездесу барысында өндіріс үшін қажетті сүйек шикізатын тұрақты негізде жинақтау тетіктері, оны қайта өңдеу зауытына уақтылы жеткізу жолдары, сондай-ақ дайын өнімді ішкі нарықта өткізу және экспортқа шығару мәселелері кеңінен қаралды. Облыс әкімінің орынбасары жобаның өңір экономикасына қосатын үлесін атап өтіп, тиісті басқармалар мен ұйымдарға заң талаптарын сақтай отырып, инвесторға жан-жақты қолдау көрсету жөнінде нақты тапсырмалар жүктеді.
Жоспарға сәйкес, өндіріс орны 10 гектар аумақта орналасатын болады. Жобаның жалпы инвестициялық құны 9 млрд теңгені құрайды. Зауытта ірі қара мал сүйектерін терең өңдеу арқылы желатин өнімдері мен пептон қоспасы өндіріледі. Аталған өнімдер фармацевтика, тамақ өнеркәсібі және ауыл шаруашылығы салаларында кеңінен қолданылады. Өндіріс іске қосылғаннан кейін 100-ге жуық жаңа тұрақты жұмыс орны ашылып, жергілікті тұрғындардың жұмыспен қамтылуына оң әсерін тигізеді. Зауыттың жобалық қуаттылығы – жылына 5 мың тонна дайын өнім. Заманауи технологиялармен жабдықталған кәсіпорынды 2026 жылы пайдалануға беру жоспарланып отыр.
Өндіріс процесінде экологиялық талаптардың қатаң сақталуына ерекше мән берілмек. Су ресурстарын үнемдеу, энергия тиімді технологияларды қолдану, өндірістік қалдықтарды барынша азайту және санитарлық-экологиялық нормаларды сақтау басты назарда болады. Бұл өз кезегінде қоршаған ортаға келетін кері әсерді төмендетіп, өңірдегі экологиялық ахуалды жақсартуға ықпал етеді. Сонымен қатар, жобаның іске асуы экологияны қорғау саласындағы мемлекеттік саясатпен және «Таза Қазақстан» экологиялық бастамасының мақсаттарымен өзара үндеседі.
Ірі қара мал сүйектерін қайта өңдеу зауытының іске қосылуы Түркістан облысының индустриялық әлеуетін арттырып қана қоймай, ауыл шаруашылығы саласында қалыптасатын шикізатты тиімді игеруге мүмкіндік береді. Бұл – экономиканы әртараптандыру, өңдеу өнеркәсібін дамыту және экспортқа бағдарланған өндірістерді қалыптастыру жолындағы маңызды қадам. Сонымен қатар, жоба өңірге шетелдік инвестиция тарту ісіне де оң ықпал етіп, халықаралық әріптестікті нығайтуға негіз болады.
Қорытындылай келе, Ордабасы ауданында жүзеге асырылып жатқан ірі қара мал сүйектерін қайта өңдеу жобасы жасыл экономика қағидаттарына негізделген, экологиялық жауапкершілікті көздейтін және өңірдің тұрақты дамуына бағытталған маңызды инвестициялық бастама болып табылады. Бұл жоба Түркістан облысының өндірістік әлеуетін жаңа деңгейге көтеріп, табиғи ресурстарды ұтымды пайдалану арқылы халықтың әл-ауқатын арттыруға қызмет ететін болады.