Мемлекет басшысының қоршаған ортаны қорғау, су ресурстарын тиімді пайдалану және халықты сапалы ауыз сумен қамтамасыз ету жөніндегі тапсырмалары аясында Түркістан облысында экологиялық қауіпсіздікті нығайтуға бағытталған кешенді жұмыстар атқарылуда. Өңірде энергия тиімділік саясатын іске асыру, жасыл экономика қағидаттарын енгізу және су шаруашылығы инфрақұрылымын жаңғырту мәселелері негізгі басымдықтардың бірі ретінде айқындалған.
Түркістан облысы климаттық ерекшеліктеріне байланысты су ресурстарына тәуелді өңірлердің қатарына жатады. Сондықтан ауыз су көздерін қорғау, су үнемдеу технологияларын енгізу және инфрақұрылымды жаңарту – экологиялық тұрақтылықты қамтамасыз етудің басты тетігі болып табылады. Осы мақсатта облыс аумағында елді мекендерді орталықтандырылған ауыз сумен қамту, тозығы жеткен су желілерін жаңарту және жаңа су нысандарын салу жұмыстары кезең-кезеңімен жүзеге асырылуда.
Су ресурстарын қорғау бағытындағы жүйелі жұмыстар Келес ауданында да қарқынды жүргізілуде. ҚР Премьер-Министрінің кеңесшісі Ералы Тоғжановтың өңірге жұмыс сапары барысында аудан аумағында жүзеге асырылып жатқан ауыз су нысандарының жай-күйі жан-жақты зерделенді. Сапар барысында Түркістан облысы әкімінің бірінші орынбасары мен аудан басшылығы атқарылып жатқан жұмыстар жөнінде баяндап, жобалардың орындалу барысы туралы нақты ақпарат ұсынды.
Ақсу, Жуантөбе, Жаңадәуір, Ескіқорған, Құйған және Қияжол елді мекендерінде салынып жатқан және пайдалануға берілген ауыз су нысандарының жұмысы тексеріліп, тұрғын үйлерге орталықтандырылған су жүйесінің тұрақты түрде жеткізіліп отырғаны нақтыланды. Аталған жобалар халықты сапалы ауыз сумен қамту деңгейін арттыруға және санитарлық-эпидемиологиялық жағдайды жақсартуға бағытталған.
Ауыз су жүйелерін жаңғырту барысында энергия тиімділік қағидаттарына да басымдық берілуде. Насос стансаларын заманауи жабдықтармен қамту, су қысымын автоматты реттеу жүйелерін енгізу арқылы электр энергиясының шығыны азайтылып, табиғи ресурстарды ұтымды пайдалану қамтамасыз етіледі. Бұл – жасыл экономика қағидаттарының нақты іске асуының бір көрінісі.
Сонымен қатар орталықтандырылған су жүйесіне көшу жеке ұңғымалар мен бейберекет су пайдалануды азайтып, жер асты суларының қорын сақтауға мүмкіндік береді. Бұл өз кезегінде экологиялық тепе-теңдікті сақтауға және қоршаған ортаға келетін зиянды төмендетуге ықпал етеді.
Сапалы ауыз су – халықтың денсаулығы мен өмір сапасының негізгі көрсеткіштерінің бірі. Осыған байланысты өңірде жүзеге асырылып жатқан су жобалары экологияны қорғау шараларымен тікелей байланысты. Тозған құбырлардың жаңартылуы арқылы су ысырабы азайып, топырақтың тұздануы мен ластануының алдын алу мүмкіндігі артады.
Ауыл тұрғындарымен кездесулер барысында жергілікті халық жаңа су жүйелерінің игілігін көріп отырғандарын айтып, тұрақты әрі таза ауыз суға қол жеткізудің маңыздылығын атап өтуде. Бұл жұмыстар әлеуметтік тұрақтылықты қамтамасыз етіп қана қоймай, экологиялық мәдениетті қалыптастыруға да оң әсерін тигізеді.
Атқарылып жатқан жобалар «Таза Қазақстан» экологиялық акциясының мақсаттарымен де өзара үйлеседі. Су көздерін қорғау, инженерлік желілерді ретке келтіру және санитарлық жағдайды жақсарту – елді мекендердің экологиялық ахуалын жақсартудың маңызды құрамдас бөлігі. Осы арқылы табиғатқа ұқыпты қарау, су ресурстарын сақтау және келер ұрпаққа таза орта қалдыру қағидаты жүзеге асырылуда.
Өткен жылы Келес ауданында 13 ауылды ауыз сумен қамту жұмыстары жүргізілді. Жобалар қайтарылған активтер есебінен қаржыландырылып, әлеуметтік маңызы бар нысандардың қатарын толықтырды. Бұл мемлекет тарапынан экология мен халықтың тұрмыс сапасын жақсартуға бағытталған нақты қадамдардың бірі болып саналады.
Алдағы уақытта да Түркістан облысында су ресурстарын қорғау, энергия тиімділігін арттыру және жасыл экономика қағидаттарын енгізу бағытындағы жұмыстар жүйелі түрде жалғасын табады. Бұл бастамалар өңірдің экологиялық қауіпсіздігін нығайтып, тұрақты дамуына берік негіз қалайды.
Түркістан облысында жүзеге асырылып жатқан ауыз су инфрақұрылымын жаңғырту жобалары су ресурстарын қорғау, қоршаған ортаны сақтау және жасыл экономика қағидаттарын іске асырудың нақты үлгісі болып табылады. Мемлекеттік саясатпен үндес бұл жұмыстар халықтың өмір сапасын арттыруға, экологиялық қауіпсіздікті қамтамасыз етуге және табиғи ресурстарды ұтымды пайдалануға бағытталған.
Су – тіршілік көзі. Сондықтан оны сақтау мен тиімді басқару – бүгінгі күннің ғана емес, болашақ ұрпақ алдындағы ортақ жауапкершілік.