Қоғамның рухани дамуы мен ұлттық құндылықтардың жаңғыруы – бүгінгі күннің басты бағыттарының бірі. Осы тұрғыдан алғанда, отбасы институтын нығайту, ананың қоғамдағы мәртебесін арттыру және жас ұрпаққа ұлттық тәрбие беру бағытындағы бастамалардың маңызы ерекше. Бұл бағытта AMANAT партиясы жанындағы Әйелдер қанаты жүйелі жұмыстар жүргізіп, өңірлерде тағылымды іс-шараларды жүзеге асыруда.
Түркістан облысы, Шардара ауданында партияның «Ұлттық мұра» жобасы аясында ұйымдастырылған «Аналар аманаты» рухани іс-шарасы – ұлттық мәдениет пен дәстүрді дәріптеген ерекше мәдени-танымдық бастама болды. Іс-шараның негізгі мақсаты – қазақ халқының салт-дәстүрін жаңғырту, қыз тәрбиесі мен ана рөлін дәріптеу, сондай-ақ ұлттық киім үлгілері арқылы рухани құндылықтарды насихаттау.
Аталған тағылымды шара Шардара қаласының орталық стадионында кең көлемде ұйымдастырылып, «Сәукеле-2026» шеруімен айшықталды. Шерудің басты ерекшелігі – қазақ халқының рухани мұрасын бейнелейтін алып сәукеленің көпшілік назарына ұсынылуы болды. Биіктігі 6 метрге жеткен бұл сәукеле – қазақ қызының болмысы мен ұлттық эстетиканың биік үлгісін көрсететін бірегей туынды ретінде көпшіліктің қызығушылығын тудырды.
Сәукеле – қазақ мәдениетінде ерекше символдық мәнге ие бас киім. Ол қыз баланың бойжеткен кезеңінен жаңа өмірге қадам басуын білдіріп, отбасы құндылығы мен жауапкершіліктің бастауы ретінде бағаланады. Алып сәукеленің әрбір өрнегі, әшекейі мен құрылымы халқымыздың дүниетанымын, эстетикалық талғамын және рухани тереңдігін айқындайды. Бұл туынды тек сәндік бұйым ғана емес, ұлттық тарих пен мәдениеттің көркем көрінісі.
Өткен жылы Түркістан қаласында өткен «Сәукеле-2025» жобасы барысында шардаралық шебер Ақмарал Дауылбаеваның қолынан шыққан сәукеле халықаралық деңгейде танылып, Global Book of Records кітабына енген болатын. Оның биіктігі 5 метр 20 сантиметр болып, 31 түркі халқының ою-өрнектерімен безендірілген. Бұл – қазақ қолөнерінің әлемдік деңгейде мойындалуының айқын дәлелі.
Биылғы «Сәукеле-2026» шеруі де өз жалғасын тауып, ұлттық өнер мен руханиятты дәріптейтін ауқымды мәдени оқиғаға айналды. Іс-шараға аналар, қыз-келіншектер, мектеп оқушылары, білім және мәдениет саласының қызметкерлері, спортшылар мен өнер майталмандары қатысты. Барлығы 500-ге жуық адам шеруге қатысып, ұлттық киім үлгілерін көрсетті.
Шара барысында «Қазақ аналары – Дәстүрге жол» республикалық қоғамдық бірлестігінің Шардара аудандық филиалы өкілдері, партияның Әйелдер қанаты мүшелері және ақ жаулықты аналар белсенділік танытты. Сонымен қатар, аудан мектептерінің 300-ден астам оқушысы ұлттық билер мен көріністерді сахналап, көпшілікке рухани әсер сыйлады.
Іс-шараға қатысқан мәртебелі қонақтардың қатарында AMANAT партиясы Түркістан облыстық филиалы атқарушы хатшысының орынбасары, облыстық Әйелдер қанатының жетекшісі, Түркістан облыстық мәслихатының депутаты Қалыйма Жантөреева, Шардара ауданы әкімінің орынбасары Еркебұлан Каратунов және партияның Шардара аудандық филиалының атқарушы хатшысы Бауыржан Шомпиев болды. Олар шараның маңыздылығына тоқталып, ұлттық құндылықтарды насихаттауға бағытталған бастамаларды қолдайтындықтарын жеткізді.
Қалыйма Жантөреева өз сөзінде ұлттық мұраның ұрпақ тәрбиесіндегі орны ерекше екенін атап өтті. Оның айтуынша, мұндай бастамалар жастардың ұлттық сана-сезімін қалыптастырып, тарихи тамырынан ажырамауына ықпал етеді.
– Сәукеле – тек сәндік бұйым емес, ол тұтас ұлттың рухани келбетін айшықтайтын асыл мұра. Оның әрбір өрнегінде ананың мейірімі, әкенің аманаты және халықтың ғасырлар бойғы дүниетанымы жатыр. Бүгінгі іс-шара – ұлттық тәрбиені дәріптейтін тағылымды бастама. Біз жас ұрпаққа ұлттық құндылықтарды тек сөзбен емес, осындай көрнекі әрі мазмұнды шаралар арқылы сіңіруіміз керек, – деді ол.
Шеру барысында ұлттық құндылықтарды бейнелейтін жеті символикалық желек ұсынылды. Әр желек қазақ қоғамының негізгі рухани және әлеуметтік құндылықтарын айшықтады. «Әлемнің жарығы – Ана», «Татулық пен бірлік», «Денсаулық – ең үлкен байлық», «Еңбек – елге мұрат», «Ана – бала бақыты», «Таза қоршаған орта» және «Мәдениет пен руханият» атты желектерді қоғамда абыройлы еңбек етіп жүрген аналар мен ардагер ұстаздар алып шықты.
Бұл символикалық элементтер іс-шараның мазмұнын тереңдетіп, ұлттық идея мен қоғамдық құндылықтардың сабақтастығын көрсетті. Әрбір желек тек көркем бейне ғана емес, қоғамның дамуына негіз болатын маңызды ұстанымдарды білдірді.
Шерудің тағы бір маңызды бөлігі – ұлттық өнер мен мәдениеттің көрініс табуы болды. Атап айтқанда, «Қара жорға», «Гәкку» және «Қазақ биі» сынды ұлттық билер орындалып, халық әндері мен күйлері шырқалды. Бұл көріністер ұлттық өнердің өміршеңдігін және оның жас ұрпаққа беретін тәрбиелік мәнін айқын көрсетті.
Іс-шара соңында ұйымдастырылған концерттік бағдарлама көрермендерге ерекше рухани әсер сыйлады. Сахнада өнер көрсеткен жастар мен оқушылар ананың мейірімі мен қазақ қызының инабаттылығын сахналық көріністер арқылы бейнелеп, ұлттық тәрбиенің маңызын терең жеткізді.
«Аналар аманаты» іс-шарасы – тек мәдени шара ғана емес, ол қоғамдағы рухани жаңғырудың, ұлттық құндылықтарды дәріптеудің және ұрпақ сабақтастығын нығайтудың нақты көрінісі болды. Әйелдер қанатының бастамасымен ұйымдастырылған бұл тағылымды кеш аналардың қоғамдағы рөлін айшықтап, ұлттық тәрбиенің маңызын тағы бір мәрте дәлелдеді.
Қорытындылай келе, Шардара ауданында өткен «Аналар аманаты» іс-шарасы – ұлттық мұраны жаңғыртуға бағытталған маңызды қадам. Бұл бастама жас ұрпақтың бойында отансүйгіштік сезімді қалыптастырып, ұлттық құндылықтарға деген құрметті арттыруға зор үлес қосты. Сонымен қатар, AMANAT партиясының Әйелдер қанатының жүйелі жұмысының нәтижесінде қоғамда отбасы құндылықтарын нығайту және ұлттық тәрбиені дамыту бағытындағы маңызды істер жалғасын табуда.