Шымкент қаласында экологиялық мәдениетті нығайту, қоршаған ортаны қорғау мен тұрғындардың табиғатқа деген жауапкершілігін арттыру мақсатында «Таза Қазақстан» жалпыұлттық акциясы қарқынды түрде жалғасуда. Бұл бастама еліміздің әр өңірінде қолдау тауып, қоғамның экологиялық сана-сезімін көтеруге, сондай-ақ әрбір азаматтың туған жерінің тазалығы мен көркеюіне үлес қосуға бағытталған.
Бүгін Шымкент қаласының барлық аудандарында кезекті сенбілік ұйымдастырылып, кең көлемде тазалық жұмыстары жүргізілді. Әсіресе, Тұран ауданында экологиялық іс-шара ерекше қарқынмен өтті. Қалалық жайлы ортаны дамыту басқармасының бастамасымен, аудан әкімдігі мен «ШымкентСпецКомплекс» ЖШС-нің қолдауымен Бадам өзенінің жағалауында тазалық жұмыстары атқарылды. Бұл жұмыс тек санитарлық мақсатта емес, табиғи аймақтың экологиялық тепе-теңдігін сақтау мен тұрғындарға үлгі болу үшін де қолға алынды.
Іс-шара барысында өзен бойындағы және оған іргелес аумақтар тұрмыстық қалдықтардан, пластик бөтелкелер мен әртүрлі қоқыстардан толық тазартылды. Сонымен қатар шөптер орып, ағаш түптері әктеліп, өзен арнасы бойындағы өсімдіктер ретке келтірілді. Жұмысқа барлығы 4 арнайы техника мен 40-қа жуық коммуналдық қызметкер тартылды. Арнайы жүк көліктері мен тракторлар көмегімен жиналған қалдықтар тиісті полигондарға шығарылды.
Тазалық шарасына аудан тұрғындары, жастар ұйымдары мен еріктілер де белсене қатысты. Олар табиғатты қорғаудың маңызын айтып, мұндай акциялар азаматтардың экологиялық мәдениетін қалыптастыруда айрықша рөл атқаратынын атап өтті. Көптеген қатысушылар бұл шараны тұрақты түрде өткізу қажеттігін жеткізді. Өйткені әрбір сенбілік – тек қоқыс жинау емес, қоғамның экологиялық санасын арттырып, келешек ұрпаққа таза табиғи орта қалдырудың жарқын мысалы.
Қалалық экология департаменті мен аудан әкімдігі өкілдері өз кезегінде тазалық жұмыстарын бір реттік шара ретінде емес, жүйелі үрдіске айналдыру қажеттігін айтты. Себебі, өзендер мен су арналарының ластануы қала экожүйесіне кері әсер етіп қана қоймай, тұрғындардың өмір сапасына да тікелей ықпал етеді. Ластанған су көздері санитарлық қауіпсіздікке қатер төндіріп, табиғи биоәртүрліліктің жойылуына себеп болуы мүмкін.
«Таза Қазақстан» республикалық акциясы алдағы уақытта да өз жалғасын табады. Бұл бастама арқылы қала тұрғындарына табиғатты қорғау, қоршаған ортаны таза ұстау және туған жердің экологиялық тұрақтылығын сақтау – әр азаматтың ортақ борышы екені ұғындырылуда. Бадам өзенінің жағалауын абаттандыру – Шымкенттің экологиялық қауіпсіздігін қамтамасыз етудің маңызды бағыттарының бірі болып табылады.
Мұндай игі істер тек сенбілік шеңберінде ғана емес, күнделікті өмірдің дағдысына айналуы қажет. Тазалық мәдениеті әр адамның санасында қалыптасқанда ғана қала шын мәнінде көркейіп, өмір сүруге жайлы ортаға айналады.