3–5 қараша аралығында Шымкент қаласының барлық аудандарында прокуратураның ұйымдастыруымен «СТОП-ВЕЙП!» атты кең ауқымды профилактикалық акция өтіп жатыр. Бұл шараның басты мақсаты – вейп өнімдерінің заңсыз айналымының алдын алу, тұрғындар арасында оның адам денсаулығына тигізетін зияны жөнінде жан-жақты түсіндіру жұмыстарын жүргізу және азаматтарға өз еркімен, ешқандай жауапкершілікке тартылмай, электронды темекілерді тапсыру мүмкіндігін ұсыну болып табылады.
Акция аясында қала аумағында арнайы қабылдау пункттері ұйымдастырылды. Қала тұрғындары өз вейптерін Shymkent Plaza, Самал және Алаш базарларындағы, сондай-ақ Грамад, Фиркан, Shymkent City Mall, Rahima Plaza, Diamond Plaza, Баян Сұлу және Юг Сити сауда орталықтарындағы қабылдау орындарына еркін түрде өткізе алады. Барлық пункттерде құқық қорғау органдары мен волонтерлер кезекшілік атқарып, азаматтарға ақпараттық түсіндіру жұмыстарын жүргізуде.
Бұл бастама – қоғамның ең өзекті мәселелерінің біріне айналған вейп өнімдерінің таралуына қарсы күрестің маңызды бөлігі. Соңғы жылдары электронды темекі мен никотинді буландырғыш құрылғылардың қолданылуы, әсіресе жастар мен жасөспірімдер арасында күрт артқан. Мамандардың айтуынша, вейп құрамында никотин, ауыр металдар және өкпеге зиянды химиялық қоспалар бар. Ол адамның тыныс алу жүйесіне, жүрек-қан тамырлары мен жүйке жүйесіне теріс әсер етеді.
Прокуратура және жергілікті билік органдарының өкілдері тұрғындарды вейптен бас тартуға шақыра отырып, әр азаматтың денсаулығын қорғау – тек жеке жауапкершілік емес, қоғам алдындағы борыш екенін еске салды. «СТОП-ВЕЙП!» акциясы тек заңсыз саудамен күрес қана емес, сонымен қатар жастар арасында салауатты өмір салтын қалыптастырудың тиімді құралына айналып отыр.
Шара барысында мектептер мен жоғары оқу орындарында да түсіндіру кездесулері, бейнероликтер көрсетілімі және тақырыптық дәрістер ұйымдастырылуда. Сонымен бірге волонтерлер мен жастар ұйымдары қала көшелерінде ақпараттық буклеттер таратып, вейптің зияны жөнінде кеңінен үгіт-насихат жүргізуде.
Қала әкімдігі мен құқық қорғау органдарының мәліметінше, акция тұрақты түрде жалғасып, вейп өнімдерін сатумен айналысатын нүктелерге тексерістер күшейтіледі. Тәртіп бұзғандарға заң аясында шаралар қолданылады.
Азаматтардың белсенді қатысуы мен қоғамның қолдауы – бұл бастаманың табысты жүзеге асуына ықпал етпек. Вейпке «жоқ» деп айту – өз денсаулығың мен болашағыңа «иә» деу екенін ұмытпаған жөн.
Толығырақ ақпарат пен түсіндірме жұмыстарын Шымкент қаласының ресми YouTube арнасынан көруге болады:
🔗 https://www.youtube.com/live/mP9jccfb70g?si=stxI4OA3bx20rutd
#РСКШЫМКЕНТ #БРИФИНГ