Шымкент қаласындағы Қажымұқан атындағы орталық стадион соңғы жылдары спорттық инфрақұрылымды жаңғыртудың үлгісіне айналып келеді. Биылғы жылы нысанның бірқатар маңызды бөліктері толықтай қайта жабдықталып, жаңа келбетке ие болды. Бұл жұмыстардың барлығы қала тұрғындары мен спортсүйер қауымға қолайлы жағдай жасау, сонымен қатар халықаралық стандарттарға сай спорттық инфрақұрылым қалыптастыру мақсатында жүргізілді.
Жыл басында «Ордабасы» футбол клубының демеушілігімен стадиондағы табиғи газон толығымен жаңартылды. Бұрынғы ескі жамылғының орнына сапасы жоғары жаңа үлгідегі табиғи көгал төселіп, оның күтімін жеңілдету үшін автоматты суару жүйесі орнатылды. Бұл жүйе суды үнемдеп, алаңдағы газонның біркелкі және тұрақты күтімін қамтамасыз етеді. Жобаның жалпы құны 78 миллион теңгені құрады, оның ішінде газонды ауыстыруға 54 миллион теңге, ал суару жүйесіне 24 миллион теңге бағытталды. Бұл жұмыстарды тәжірибесі мол, халықаралық стандарт бойынша жұмыс істейтін арнайы компания жүзеге асырды.
Сонымен қатар, спортшылар мен жеңіл атлетика әуесқойлары үшін үлкен жаңалық — жүгіру жолақтарының толық жаңартылуы болды. Бұрынғы жабын орнына халықаралық стандарттарға сай көк түсті тартан жабыны төселді. Бұл жамылғы жарақаттың алдын алып, спортшыларға жайлы әрі қауіпсіз жағдай туғызады. 8 жолақтан тұратын бұл алаңды жаңарту жұмыстарының жалпы құны 380 миллион теңгеге жетіп, барлығы демеушілердің қолдауымен жүзеге асырылды.
Жаңғырту жұмыстары тек алаңмен шектелген жоқ. Стадион аумағы абаттандырылып, көгалдандыру жұмыстары жүргізілді. Негізгі командаға арналған арнайы жаттығу және қалпына келтіру блогы ашылды. Бұл аймақ спортшылардың дайындық деңгейін арттыруға және ойыннан кейін қалпына келу үдерісін жақсартуға мүмкіндік береді. Сондай-ақ бапкерлер мен қосалқы құрам ойыншыларына арналған ыңғайлы орындықтар орнатылды, ал көрермендерге арналған орындар мен ВИП-кабиналар да жаңартылып, заманауи талаптарға сай жабдықталды.
Стадионның техникалық жарақтандырылуы да жаңа деңгейге көтерілді. Мұнда үлкен мультимедиялық табло мен жоғары сапалы LED-экрандар орнатылып, матч барысын көрермендерге барынша айқын әрі әсерлі көрсету мүмкіндігі туды. Сонымен бірге стадионның айналасына заманауи борттық мониторлар қойылып, жарыстарды ұйымдастыру мен жарнама көрсету жүйесі жетілдірілді.
Жалпы алғанда, жаңғырту жұмыстарына жергілікті бюджеттен 149 миллион теңгеден астам қаражат бөлінді. Ал негізгі құрылыс материалдары мен қымбат жабдықтар демеушілердің есебінен қамтамасыз етілді. Бұл – мемлекеттік қолдау мен жеке сектор ынтымақтастығының тиімді нәтижесін көрсететін айқын мысал.
Бүгінде жаңартылған Қажымұқан атындағы стадион тек футболшылар мен жеңіл атлеттер үшін ғана емес, сонымен қатар қала тұрғындары мен қонақтары үшін де нағыз спорт мерекесінің ордасына айналмақ. Заманауи инфрақұрылым, ыңғайлы трибуналар, халықаралық талаптарға сай алаңдар – мұның бәрі Шымкенттің спорттық өмірін жаңа белеске көтереді.
Жаңартылған «Орталық» стадион енді халықаралық деңгейдегі ойындар мен спорттық іс-шараларды өткізуге толық мүмкіндік береді. Бұл жобалық өзгерістер – Шымкент қаласының спорт саласына деген қамқорлығының, жанкүйерлерге құрметінің және болашаққа сенімінің айқын көрінісі.
Толығырақ: https://www.youtube.com/live/0BWUpHWDaXQ?si=ObcnD-KnaQUa2X3P
#РСКШЫМКЕНТ #БРИФИНГ