Шымкент қаласында азық-түлік бағаларын тұрақтандыру, әлеуметтік маңызы бар тауарлардың қолжетімділігін қамтамасыз ету және инфляцияны тежеу мақсатында ауқымды жұмыс жүргізілуде. Бүгін қала әкімдігі мен кәсіпкерлік субъектілері арасында өзара ынтымақтастықты көздейтін 100-ден астам меморандумға қол қойылды. Бұл келісімдер – тек формалды құжат емес, қала тұрғындарының әлеуметтік әл-ауқатын қорғауға бағытталған маңызды шаралардың бірі.
Меморандумға «Грамад», «F-Mart» сияқты ірі сауда желілері, көтерме және бөлшек сауда орталықтары, сондай-ақ ұн, ет, сүт өнімдері, жұмыртқа, өсімдік майы және нан-тоқаш өнімдерін өндіретін жергілікті кәсіпорындар қосылды. Сауда желілерінің бұл бастамаға белсенді түрде атсалысуы – нарықтағы тұрақтылықты қамтамасыз етуге деген жауапты көзқарастың көрінісі.
Қала әкімінің бірінші орынбасары Айдын Кәрімовтың айтуынша, меморандумға қол қою – уақытша шара емес, соңғы бірнеше жылда қалыптасқан әкімдік пен бизнес арасындағы өзара тиімді серіктестіктің жалғасы.
«Қаладағы кәсіпкерлер жоғары әлеуметтік жауапкершілігін көрсетіп, бағаның негізсіз өсуіне жол бермеуге мүдделілік танытып отыр. Бүгін біз осы ынтымақтастықты ресми түрде тағы да растадық. Біздің ортақ міндетіміз – тұрғындарға ашық, қолжетімді және тұрақты нарық қалыптастыру, баға динамикасын тұрақты бақылауда ұстау және кез келген өзгеріске жедел әрекет ету», – деді А.Кәрімов.
Меморандум аясында делдалдық тізбектерді қысқарту, әлеуметтік маңызы бар азық-түлік тауарларының бағасын негізсіз қымбаттатпау, саудадағы ашықтықты арттыру және инфляцияға қарсы шараларды бірлесе жүзеге асыру бағытында келісімдер қабылданды. Бұл бастама қаланың азық-түлік қауіпсіздігін күшейтуге, шағын және орта бизнес субъектілерінің тұрақты жұмыс істеуіне, сондай-ақ тұрғындардың әлеуметтік жағдайын жақсартуға ықпал етеді.
Сонымен қатар, әкімдік тарапынан азық-түлік бағаларына күнделікті мониторинг жүргізілетіні, нарықтағы кез келген ауытқулар бойынша кәсіпкерлермен жедел байланыс орнатылатыны атап өтілді. Баға тұрақтылығын қамтамасыз етуге бағытталған бұл жұмыс алдағы уақытта да үздіксіз жүргізіледі.
Жалпы, қол қойылған 100-ден астам меморандум – Шымкенттің әлеуметтік-экономикалық дамуындағы маңызды қадамдардың бірі. Бұл құжаттар тұрғындарды қолжетімді өнімдермен қамтамасыз етуге, нарықтағы тұрақсыздықтың алдын алуға және инфляциялық қысымды төмендетуге бағытталған кешенді шаралардың тиімді жүзеге асуына мүмкіндік береді.