Шымкент қаласында көлік қозғалысын тиімді ұйымдастыру, жол қозғалысы қауіпсіздігін арттыру және көше қиылыстарындағы көлік ағымын оңтайландыру мақсатында кешенді шаралар қолға алынды. Қала әкімдігі мен Жолаушылар көлігі және автомобиль жолдары басқармасы мамандарының талдауы нәтижесінде бірқатар маңызды көшелер мен қиылыстарда бағдаршам жүйелерін жаңарту және қосымша секциялар орнату жұмыстары жүргізілді.
Атап айтқанда, Т. Рысқұлов – Жолан батыр көшелерінің қиылысында бағдаршамның қосымша секциясы жасыл түсті «(+)» белгісіне ауыстырылды. Бұл шешім жүргізушілерге қозғалыс бағытын еркін таңдау мүмкіндігін беріп, көше жүктемесін азайтуға септігін тигізеді. Сондай-ақ Д. Қонаев – Тәуке хан даңғылдарының қиылысында оңға бұрылуға арналған қосымша секция орнатылып, қозғалыстың үздіксіздігін қамтамасыз етті.
Одан бөлек, Бәйтереков – Н. Назарбаев көшелерінің қиылысында Н. Назарбаев даңғылынан оңға бұрылуға арналған жаңа секция қосылды. Бұл өзгеріс аталған аймақта жиі байқалатын көлік кептелістерін азайтуға бағытталған. Ал Қ. Қазиев – Ұ. Арғынбеков көшелерінің қиылысында солға бұрылуға мүмкіндік беретін жасыл «(+)» бағдаршам шамы қойылды. Бұл реттеу трафикті тиімді бөлуге және жол қозғалысы қауіпсіздігін арттыруға көмектеседі.
Мамандардың айтуынша, жүргізілген жұмыстар қаланың көлік инфрақұрылымын жетілдіруге, жолаушылар мен жүргізушілер үшін ыңғайлы қозғалыс жағдайын жасауға бағытталған. Сонымен қатар, бұл шаралар экологиялық әсерді төмендетіп, қозғалыс уақытының қысқаруына ықпал етеді.
Қала әкімдігі алдағы уақытта да көше қозғалысын оңтайландыру бағытындағы шараларды жалғастырып, бағдаршам жүйелерін интеллектуалды басқару технологияларымен жабдықтауды жоспарлап отыр. Сонымен қатар, тұрғындардан келіп түскен ұсыныстар мен шағымдар тұрақты түрде қаралып, жол қозғалысын жақсартуға арналған шешімдер қабылдануда.
Мұндай бастамалар Шымкенттің көлік инфрақұрылымын заманауи деңгейге көтеріп, мегаполистегі қозғалыс мәдениетін арттыруға бағытталған маңызды қадам болып саналады.
Толығырақ: https://www.youtube.com/live/mP9jccfb70g?si=stxI4OA3bx20rutd
#РСКШЫМКЕНТ #БРИФИНГ