🔹 Шымкент қаласында соңғы аптада қоғамдық тәртіпті қамтамасыз ету, құқық бұзушылықтың алдын алу бағытында жүргізілген кешенді бақылау нәтижесінде 152 қылмыстық іс тіркелді. Қалалық полиция департаментінің мәліметінше, тіркелген істердің басым бөлігі алаяқтық, ұрлық, есірткі айналымы және жол-көлік оқиғаларына байланысты. Атап айтқанда, 49 іс – түрлі тәсілмен жасалған алаяқтық, 30 іс – ұрлық, 15 іс – есірткіге қатысты заңсыз әрекеттер, ал 7 іс – жол апаттары бойынша қозғалған.
🔹 Әсіресе интернет арқылы жасалатын қылмыстар көбейіп келеді. Соңғы аптада тіркелген 14 факт онлайн сауда және өзін құқық қорғау немесе банк қызметкері ретінде таныстырып, азаматтардың сеніміне кіру арқылы жасалған. Мысалы, Шымкент тұрғынына белгісіз тұлға қоңырау шалып, өзін полиция қызметкері ретінде таныстырып, “сіздің атыңызға несие рәсімделіп жатыр” деген сылтаумен азаматтың 2 млн 312 мың теңгесін алдап алған. Бұл дерек бойынша тергеу амалдары жүргізілуде.
🔹 Құқық қорғау органдары мұндай оқиғалардан сақ болуға шақырады. Әрбір азамат жеке деректерін, банк картасының нөмірін және құпия кодтарын бөгде адамдарға жария етпеуі тиіс. Күмәнді хабарламалар мен ұсыныстар түскен жағдайда, дереу банк немесе полицияға хабарласу ұсынылады.
🔹 Сонымен қатар, интернет арқылы есірткі сату мен таратудың жаңа тәсілдері анықталуда. Өткен аптада “М” есімді азамат өз шотына белгісіз тұлғадан 100 мың теңге түскенін айтып, оны кері қайтарып, сыйақы ретінде 10 мың теңге алған. Кейін бұл қаражат есірткі саудасына қатысы бар тұлғаларға тиесілі екені анықталды. Осы оқиғаға байланысты полицейлер азаматтарға өз банк шоттарын басқа адамдардың атына пайдалануға рұқсат етпеуді және күмәнді қаржылық әрекеттерден аулақ болуды ескертті.
🔹 Қалалық тәртіп сақшылары ұрлық қылмыстарының да жиілегенін мәлімдеді. 5 қазан күні көпқабатты үй ауласында тұрған мопед ұрланып, иесіне 250 мың теңге көлемінде материалдық шығын келген. Сондай-ақ мешітке намазға келген тұрғынның ұялы телефоны ұрланған дерек те тіркелген.
🔹 Полиция департаменті азаматтарды өз қауіпсіздігіне жауапкершілікпен қарап, жеке мүліктерін қараусыз қалдырмауға, қоғамдық орындарда қырағылық танытуға шақырады. Әсіресе егде жастағы адамдар мен жастарға интернеттегі алаяқтық түрлері туралы түсіндіру жұмыстары жүйелі түрде жүргізіліп жатыр.
📌 Тәртіп сақшыларының айтуынша, қылмыстың алдын алудың ең тиімді жолы – азаматтардың өз қауіпсіздігін қамтамасыз ету және кез келген күмәнді әрекеттер туралы дереу полицияға хабарлау.
Сақтық – қауіпсіздіктің басты кепілі!