Түркістан облысында тұрғындардың өмір сүру сапасын арттыру, балалар мен жастардың бос уақытын тиімді өткізуіне жағдай жасау мақсатында кешенді жұмыстар жалғасуда. Соның айқын көрінісі ретінде Арыс қаласында үш бірдей заманауи ойын алаңшасы пайдалануға берілді. Бұл жобалар қала тұрғындарының сұранысы мен әлеуметтік қажеттіліктерін ескеріп жүзеге асырылған.
Жаңа ойын алаңшалары Арбат аумағында, ШПЗ елді мекеніндегі Н.Ільясов көшесінде және орталықтағы М.Жұмабаев көшесінде салынды. Әр алаңша балалардың қауіпсіздігі мен белсенді дамуына лайықталып жобаланған. Мұнда түрлі жастағы балаларға арналған 10-нан астам ойын және дене шынықтыру элементтері орнатылған. Барлық құрылғылар халықаралық стандарттарға сай әрі экологиялық таза материалдардан жасалған. Сонымен қатар ойын алаңшалары сәнді жарық шамдармен қамтылып, түнгі уақытта да балалардың ойнауына мүмкіндік беріп отыр.
Жобаның басты мақсаты – тұрғындарға қолайлы орта қалыптастыру, балалардың денсаулығын нығайтуға, спортқа және белсенді өмір салтына бейімдеуге жағдай жасау. Жаңа алаңшаларда әткеншектер, сырғанақтар, өрмелеу конструкциялары, мини-спорт элементтері және демалуға арналған орындықтар орнатылған.
Қала тұрғындарының айтуынша, мұндай алаңшалар Арыста бұрын-соңды болмаған деңгейде салынып жатыр. Жергілікті ана, төрт баланың анасы Гүлмира Сейтжанова бұл игі іске ризашылығын білдірді:
«Біздің балалар бұрын бос уақытында көшеде ойнап, қауіпсіздік жағы алаңдататын. Енді осындай әдемі, жарық әрі таза ойын алаңшалары бар. Бұл – біздің балаларымыздың қуанышы, ал ата-аналар үшін – үлкен қолдау. Осындай игі жобаларды іске асырып жатқан әкімдікке алғыс айтамыз», – деді ол.
Жалпы, биыл Арыс қаласында 17 жаңа балалар ойын алаңшасын орнату жоспарланған. Оның 10-ы – қаланың өзінде, 7-еуі ауылдық округтерде бой көтереді. Барлық жобалар заманауи талаптарға сай әзірленіп, қауіпсіздік стандарттары толық сақталған. Алаңшалардың айналасы абаттандырылып, көгалдандыру жұмыстары жүргізілуде.
Сонымен қатар қала орталығындағы А.Сүлейменов көшесі, Монтайтас және Жиделі ауылдық округтеріндегі футбол алаңшалары жаңартылып, спорт инфрақұрылымын дамытуға ерекше көңіл бөлініп отыр. Бұл жұмыстардың барлығы қала әкімінің тұрғындармен кездесу кезінде айтылған өтініштері мен ұсыныстары негізінде жүзеге асырылуда.
Арыс қаласының әкімі Ғани Құрманбайдың айтуынша, тұрғындардан түскен әрбір ұсыныс назардан тыс қалмайды:
«Қала тұрғындарының жайлы өмір сүруі, балаларының қауіпсіз әрі қызықты ортада өсуі – біздің басты міндетіміз. Биылғы жылы 17 жаңа ойын және спорт алаңшасын салу арқылы біз халыққа нақты нәтижені көрсетіп отырмыз. Бұл бағыттағы жұмыстар алдағы уақытта да жалғасын табады», – деді қала басшысы.
Жобаларды жүзеге асыру барысында мердігер мекемелерге сапаға баса назар аудару тапсырылған. Әрбір нысанның құрылыс жұмыстары әкімдік пен техникалық қадағалау мамандарының тұрақты бақылауында. Алаңшаларға арналған жабдықтар еліміздің сертификатталған өндірушілерінен алынған.
Арыс қаласында соңғы жылдары тұрғындардың тұрмыс сапасын жақсартуға бағытталған әлеуметтік жобалар қарқынды іске асуда. Мысалы, былтыр ғана қалада 25 спорт және демалыс алаңы салынса, биыл бұл көрсеткіш 1,5 есеге артқан. Бұл өз кезегінде жастардың бос уақытын тиімді өткізуге және балалардың дамуына зор ықпал етуде.
Ойын алаңшаларының ашылу салтанатында балалар мен ата-аналарға арналған шағын мерекелік шара ұйымдастырылып, бүлдіршіндерге тәттілер мен сыйлықтар таратылды. Жергілікті өнерпаздар көңілді концерттік бағдарлама ұсынып, тұрғындар ерекше әсер алды.
Мұндай әлеуметтік жобалар тек балаларға қуаныш сыйлап қана қоймай, қоғамның бірлігін арттыруға да үлес қосып отыр. Қала тұрғындары жаңа алаңшаларды ұқыпты пайдалануға, айналаны таза ұстауға шақырылды.
Алдағы уақытта Арыс қаласында тағы бірнеше әлеуметтік нысанды салу жоспарда бар. Оның ішінде жаңа демалыс саябағы, жастар орталығы және спорт кешені бар. Бұл жобалар іске асқанда қаладағы қоғамдық кеңістіктердің сапасы жаңа деңгейге көтеріледі.
Түркістан облысында соңғы жылдары “Жайлы қала”, “Таза аула” және “Балалар жылы” бағдарламалары аясында ондаған жаңа ойын және спорт алаңшасы пайдалануға берілген. Бұл бағыттағы бастамалар өңір басшылығының тұрақты бақылауында.
Арыс қаласындағы жаңа ойын алаңшалары – балалардың қуанышы, ата-аналардың сенімі және жергілікті биліктің тұрғындарға деген нақты қамқорлығының көрінісі.
Түркістан облысы әкімінің баспасөз қызметі