Түркістан облысында алдағы 2025–2026 жылдардағы жылыту маусымы биыл дәстүрлі түрде қазан айының ортасынан бастап кезең-кезеңімен іске қосылмақ. Бұл туралы облыстық энергетика және тұрғын үй-коммуналдық шаруашылық басқармасы басшысының орынбасары Роза Олжабайқызы өңірлік коммуникациялар қызметінің баспасөз мәслихатында мәлімдеді.
Спикердің айтуынша, облыс аумағында жылыту маусымына толыққанды дайындық жұмыстары жаз мезгілінен басталып, бүгінде негізгі бағыттар бойынша жұмыстар аяқталуға жақын. Әсіресе әлеуметтік нысандар мен білім беру, денсаулық сақтау мекемелерін жылыту жүйесіне қосуға басымдық берілуде.
– Биылғы жылы Түркістан облысы бойынша жылыту маусымына 594,3 мың тонна көмір қажет деп жоспарланған. Қатты отынды жеткізумен 28 өңірлік оператор айналысады. Қазіргі таңда өңірдегі көмір сақтау қоймаларында 94 мың тоннадан астам көмір қоры бар. Бұл көрсеткіш өткен жылмен салыстырғанда 12 пайызға жоғары. Шұбаркөл маркалы көмірдің орташа бағасы сортына байланысты тоннасына 21-25 мың теңге көлемінде. Бағаның тұрақтылығын сақтау және көмір тапшылығын болдырмау үшін жергілікті әкімдіктер, тиісті басқармалар мен операторлар арасында тұрақты мониторинг жүргізіліп келеді, – деді Роза Олжабайқызы.
Сонымен қатар облысқа қажетті 8 мың тонна әлеуметтік мазутты тасымалдау жұмыстары да толық жоспарға сай жүріп жатыр. Бұл бағытта ҚР Энергетика министрлігімен бірлесіп тасымалдаушы операторлар анықталып, отынның бағасы бекітілген. Әлеуметтік нысандарға арналған мазутты жеткізу жұмыстары кезең-кезеңімен жүзеге асуда. Ал бюджеттік мекемелерге жалпы көлемі 3,1 миллион литр дизель отыны қажет болса, қазіргі таңда соның 1,1 миллион литрі жеткізілген.
Энергетика және тұрғын үй-коммуналдық шаруашылық басқармасының дерегінше, Түркістан облысы бойынша негізгі ірі энергия көзі саналатын кәсіпорындарда да қызу дайындық жүріп жатыр. Кестеге сәйкес, бір жылу-энерго орталығында, жеті ірі қазандықта және екі турбинада жоспарлы жөндеу жұмыстары жүргізілуде. Бұдан бөлек, 44,8 шақырым жылу желісі жаңартылуы тиіс. Қазіргі таңда төрт қазандықта жөндеу жұмыстары жалғасып жатыр. Ал жылу-энерго орталығының екі қазандығы мен екі турбинасы, сондай-ақ орталықтандырылған үш қазандықтың жаңғырту жұмыстары толық аяқталған.
Бүгінгі таңда облыс бойынша жылу жүйелерінің 44,2 шақырымы ауыстырылды. Бұл өз кезегінде тұрғын үйлер мен әлеуметтік нысандардың жылу сапасын арттырып, қыс мезгіліндегі апатты жағдайлардың алдын алуға мүмкіндік береді.
Маманның айтуынша, жылыту маусымының басталуы ауа райы жағдайына байланысты кезең-кезеңімен іске қосылады. Алдымен балабақшалар, мектептер, ауруханалар және әлеуметтік мекемелерге жылу беріледі. Кейіннен көпқабатты тұрғын үйлер мен жеке секторлар қосылады. Осылайша, 15 қазан мен 1 қараша аралығында өңірдің барлық аудан, қалалары толық жылыту жүйесіне қосылады деп жоспарлануда.
Айта кетейік, өңірде жыл сайын көмір тапшылығының алдын алу мақсатында жергілікті атқарушы органдар мен энергетика басқармасы бірлесіп, халыққа арналған көмір жәрмеңкелерін ұйымдастыруды дәстүрге айналдырған. Мұндай жәрмеңкелерде тұрғындар көмірді делдалсыз, зауыт бағасымен тікелей сатып ала алады. Бұл өз кезегінде бағаның негізсіз өсуін тежеуге және әлеуметтік аз қамтылған азаматтардың шығынын азайтуға мүмкіндік береді.
Сондай-ақ, өңірде экологиялық талаптарға сай жаңа буындағы жылыту жүйелерін енгізу бойынша да нақты жұмыстар атқарылып жатыр. Түркістан қаласында және бірқатар аудан орталықтарында энергия үнемдейтін қазандықтар орнатылып, жылыту желілері жаңартылуда. Бұл бастамалар тұтынушыларға үздіксіз әрі сапалы жылу жеткізуді қамтамасыз етуге бағытталған.
Роза Олжабайқызының айтуынша, алдағы қыс мезгілінде тұрғындар мен әлеуметтік нысандарды жылумен қамтамасыз ету бағытындағы барлық жұмыстар облыс әкімі Нұралхан Көшеровтің жеке бақылауында. Әкім аймақтың энергетикалық инфрақұрылымын жаңғырту, отын қорын толықтыру және жылыту маусымына жүйелі дайындық жұмыстарын ерекше назарда ұстап отыр.
– Қыс – сынақ кезеңі. Сондықтан жауапты сала өкілдері жылыту маусымына тыңғылықты дайындық жүргізіп, тұрғындарға қолайсыздық туындамас үшін барлық шараны қабылдауы қажет. Біздің басты мақсатымыз – халыққа сапалы әрі тұрақты жылу беру, – деді басқарма өкілі өз сөзінде.
Қорыта айтқанда, Түркістан облысы алдағы жылыту маусымына толық дайындық үстінде. Тиісті құрылымдар көмір, мазут және дизель отынының қорын жеткілікті деңгейде жинақтап, барлық инфрақұрылымдық нысандардың үздіксіз жұмысын қамтамасыз етуге күш салуда.