Жаңа бағыттардың бірі ретінде ауыл шаруашылығына арналған ұшқышсыз аппараттар өндірісі жолға қойылды. Түркістан облысында жылына 500 данаға дейін агродрон шығаратын кәсіпорын жұмысын бастады.
Бұл дрондар егістік алқаптарын өңдеуге арналған және бір ұшуда бес гектарға дейін жерді бүркей алады. Алдағы уақытта өндіруші өрт сөндіруге және жүк тасымалдауға арналған ұшқышсыз аппараттар шығаруды да меңгеруді жоспарлап отыр.
Каспий теңізіне арналған алғашқы контейнер тасымалдаушы кеме Бакуде салынып жатыр
Баку кеме жасау зауытында Каспий теңізінде қатынайтын алғашқы контейнер тасымалдаушы кеменің құрылысы басталды. Жоба Қазмортрансфлот пен Abu Dhabi Ports арасындағы ынтымақтастық аясында жүзеге асырылып жатыр.
Тараптар 2027 жылдың соңына дейін әрқайсысының сыйымдылығы 780 TEU болатын екі кеме салуды жоспарлап отыр.
Қазақстан мен Таиланд арасындағы келісімдер де экономикалық ынтымақтастыққа қосымша серпін беруі тиіс. Бангкокта өткен Қазақстан–Таиланд бизнес-форумының қорытындысы бойынша сауда, ауыл шаруашылығы, логистика және электронды коммерция салаларында жалпы құны 101 млн доллар болатын келісімдерге қол қойылды.