Мемлекет басшысы Қасым-Жомарт Тоқаев қоғам мен билік арасындағы ашық диалогты дамыту, азаматтық қоғам институттарын нығайту және ұлттық құндылықтарды дәріптеу мәселелеріне ерекше көңіл бөліп келеді. Осы бағыттағы жұмыстар өңірлерде де жүйелі түрде жүзеге асырылып, қоғамдық келісімді нығайтуға, азаматтардың қоғамдық-саяси процестерге белсенді қатысуына және патриоттық сананы қалыптастыруға ықпал етуде.
Түркістан облысында партиялық жүйені дамыту, қоғамдық ұйымдардың белсенділігін арттыру, жастарды елдік құндылықтарға тәрбиелеу және мемлекеттік рәміздерді кеңінен насихаттау бағытында ауқымды іс-шаралар тұрақты ұйымдастырылып келеді. Мұндай бастамалар азаматтық қоғамның дамуына серпін беріп қана қоймай, қоғамдағы бірлік пен тұрақтылықты нығайтуға қызмет етеді.
Осы орайда Түркістан қаласындағы «Фараб» әмбебап ғылыми кітапханасында Қазақстан Республикасының Мемлекеттік рәміздері күніне орай өткен өңірлік Патриоттар форумы ерекше маңызға ие болды. Елдік құндылықтарды ұлықтауға арналған маңызды іс-шараға мемлекеттік органдардың өкілдері, саяси партия мүшелері, қоғам белсенділері, түрлі сала мамандары мен жастар қатысты.
Форум жұмысына Түркістан облысы әкімінің орынбасары Ертай Алтаев, облыстық мәслихат төрағасы Нұралы Әбішов, «AMANAT» партиясы Түркістан облыстық филиалының төрағасы Алтынсары Үмбетәлиев және өңірдің қоғамдық-саяси өміріне белсенді араласып жүрген азаматтар қатысты. Бұл қоғамдық маңызы бар мәселелерді талқылауда мемлекеттік органдар мен азаматтық қоғам институттарының өзара ықпалдастығының жоғары деңгейде екенін көрсетті.
Іс-шара Қазақстан Республикасының Мемлекеттік Гимнін орындаумен басталды. Қатысушылар көк Ту, Елтаңба және Әнұранға деген құрметтерін білдіріп, мемлекеттік рәміздердің ел тәуелсіздігі мен ұлттық бірліктің басты нышандары екенін тағы бір мәрте айқындады.
Бүгінде мемлекеттік рәміздерді құрметтеу тек мерекелік іс-шаралармен ғана шектелмейді. Бұл – өскелең ұрпақтың бойында отансүйгіштік қасиеттерді қалыптастырудың, ұлттық бірегейлікті нығайтудың және қоғамның рухани тұтастығын сақтаудың маңызды тетігі. Осы тұрғыдан алғанда, Түркістан облысында атқарылып жатқан жұмыстардың маңызы зор.
Форум барысында сөз сөйлеген облыстық мәслихат төрағасы Нұралы Әбішов мемлекеттік рәміздердің тарихи маңызына тоқталып, олардың тәуелсіз Қазақстанның қалыптасуы мен дамуы жолындағы ерекше рөлін атап өтті. Сонымен қатар өңірдің әлеуметтік-экономикалық дамуына үлес қосып жүрген азаматтардың еңбегін жоғары бағалап, олардың қоғамдағы белсенді қызметі жастарға үлгі болуы тиіс екенін жеткізді.
Өз кезегінде Түркістан облысы әкімінің орынбасары Ертай Алтаев өңірде мемлекеттік рәміздерді кеңінен насихаттау, жастар арасында патриоттық тәрбиені күшейту және ұлттық құндылықтарды дәріптеу бағытындағы жұмыстар тұрақты жүргізіліп келе жатқанын атап өтті. Оның айтуынша, патриотизм – елдің болашағына жауапкершілікпен қараудан, адал еңбек етуден және қоғам игілігі жолында қызмет көрсетуден басталады.
Форум аясында түрлі салада жемісті еңбек етіп жүрген азаматтарды марапаттау рәсімі өтті. Денсаулық сақтау, білім беру, мәдениет, құрылыс, кәсіпкерлік, спорт, төтенше жағдайлар және құқық қорғау салаларының үздік өкілдеріне құрмет көрсетілді. Бұл еңбек адамының қоғамдағы мәртебесін арттыруға және жастар арасында адал еңбек құндылығын насихаттауға бағытталған маңызды қадам болды.
Қазіргі таңда азаматтық қоғамның дамуы ең алдымен қоғам мүшелерінің белсенділігімен өлшенеді. Ел дамуына үлес қосып жүрген азаматтарды қолдау мен олардың жетістіктерін көпшілікке таныту қоғамдық жауапкершілік мәдениетін қалыптастыруға ықпал етеді. Сондықтан еңбек адамдарын ұлықтау бағытындағы іс-шаралар қоғамдағы оң құндылықтарды нығайтудың тиімді тетігі болып саналады.
Партиялық жүйенің дамуы да азаматтық қоғамның маңызды құрамдас бөлігі болып табылады. Саяси партиялар қоғамдағы өзекті мәселелерді көтеріп, азаматтардың ұсыныстары мен бастамаларын мемлекеттік органдарға жеткізетін маңызды институт ретінде қызмет атқарады. Форумға саяси партия өкілдерінің қатысуы қоғам мен билік арасындағы байланысты күшейтуге, тұрғындардың қоғамдық-саяси өмірге қатысу белсенділігін арттыруға бағытталған жұмыстардың жүйелі жүргізіліп жатқанын көрсетті.
Түркістан облысында қоғамдық келісім мен жалпыұлттық бірлікті нығайту бағытында түрлі форматтағы кездесулер, форумдар, дөңгелек үстелдер мен жастар басқосулары тұрақты ұйымдастырылуда. Мұндай алаңдар азаматтардың пікір алмасуына, қоғамдық бастамалардың қолдау табуына және өңірдің дамуына қатысты ұсыныстардың қалыптасуына мүмкіндік береді.
Мемлекеттік тілде жүргізілетін ақпараттық сүйемелдеу жұмыстары да ерекше маңызға ие. Өйткені мемлекеттік тіл – қоғамды біріктіретін негізгі факторлардың бірі. Түркістан облысында мемлекеттік саясаттың басым бағыттарын халыққа түсіндіру, ұлттық құндылықтарды насихаттау және қоғамдық бастамаларды қолдау бағытындағы ақпараттық жұмыстар жүйелі түрде жүзеге асырылып келеді. Бұқаралық ақпарат құралдары мен әлеуметтік желілер арқылы тұрғындарға маңызды ақпараттар тұрақты жеткізіліп, қоғамдық пікір алаңы қалыптасуда.
Патриоттар форумы сынды іс-шаралар азаматтардың ел тағдырына деген жауапкершілігін арттырып, қоғамдағы бірлік пен өзара сенімді нығайтуға қызмет етеді. Сонымен қатар мұндай кездесулер жастардың бойында отансүйгіштік қасиеттерді қалыптастыруға, мемлекеттік рәміздерді құрметтеуге және ұлттық құндылықтарды дәріптеуге ықпал етеді.
Жалпы, Түркістан облысында азаматтық қоғамды дамыту, қоғамдық белсенділікті арттыру, патриоттық тәрбие беру және мемлекеттік тілдегі ақпараттық саясатты жүзеге асыру бағытындағы жұмыстар жүйелі түрде жалғасып келеді. Мемлекеттік органдар, саяси партиялар, қоғамдық ұйымдар және белсенді азаматтардың бірлескен жұмысы өңірдің тұрақты дамуына, қоғамдық келісімнің нығаюына және ұлттық құндылықтардың кеңінен дәріптелуіне негіз болып отыр.