Түркістан облысының бірнеше ауданында «Таза су айдындары» экологиялық акциясы аясында тазалық шарасы өтті. Шардара, Төлеби, Түлкібас, Сайрам, Бәйдібек, Арыс, Отырар мен Сауран аудандарында ұйымдастырылған шара барысында өзен-көлдердің жағалаулары күл-қоқыстан азартылып, арнайы аймақтарға жеткізілді.
Мәселен, Сайрам ауданында Ақсу өзенінің 4,6 шақырым жағалауын тазартуға 200-ден астам тұрғын мен 2 арнайы техника жұмылдырылған. Нәтижесінде 2,2 тонна тұрмыстық қалдық жиналып, арнайы полигонға жөнелтілді. Шараға қатысқан белсенділер тұрғындарды тазалық сақтауға шақырды.
«Қоршаған ортаны қорғау – әрбіріміздің болашақ ұрпақ алдындағы міндетіміз. Өңір тұрғындарын жазғы демалыс кездерінде табиғат аясына шыққан соң, өз аумақтарын тазалап кетуге шақырамыз»- деді аудан тұрғыны Бақытжан Тәжіханов.
Тазалық шаралары алдағы уақытта да жалғасын таппақ. Жазғы шомылу маусымы кезінде өңірдегі су айдындарының аумағында тұрақты тексеріс жүргізіледі.
Түркістан облысының Өңірлік коммуникациялар қызметі