Қазақстан Президенті Қасым-Жомарт Тоқаев өзінің Жолдауында еліміздің геология саласын дамытуға ерекше тоқталды. Мемлекет басшысы қазіргі зерттеулердің ескіргенін атап өтіп, жер қойнауын жаңа деңгейде зерделеудің уақыты келгенін жеткізді.
«Елімізде ауқымды аэро-геофизика зерттеулері әбден ескірген. Цифрлық құралдарды пайдалана отырып, жер қойнауының заманауи картасын жасайтын уақыт келді. Мұндай қадам кен орындарының әлеуетін жаңа сапалық тұрғыдан бағалауға мүмкіндік береді. Бұл жұмысқа да халықаралық сарапшыларды тартуға болады», – деді Қ.Тоқаев.
ЖАҢА КАРТА – ЖАҢА МҮМКІНДІКТЕР
Мемлекет басшысының айтуынша, заманауи карта жасау тек ресурстарды қайта бағалауға ғана емес, сонымен бірге болашақтағы экономикалық өсімге де жол ашады. Өйткені Қазақстан табиғи байлыққа бай мемлекет ретінде жер қойнауын тиімді пайдалануға ерекше назар аударуы тиіс.
ҒЫЛЫМИ НЕГІЗДІ ЗЕРТТЕУЛЕР
Президент барлау ісінің ғылыми негізсіз табысты жүзеге аспайтынын қадап айтты. Осыған орай келесі жылдың ортасына дейін халықаралық стандарттарға сай сертификатталған зертхана ашу тапсырылды. Ол Ұлттық геологиялық қызметтің базасында құрылып, ғылыми-зерттеу орталығына айналады. Мұндай орталық жер қойнауына қатысты барлық мәліметті жинақтап қана қоймай, зерттеу сапасын жаңа деңгейге көтермек.
ЖАСАНДЫ ИНТЕЛЛЕКТ ЖӘНЕ ЦИФРЛАНДЫРУ
Президент Жолдауында цифрландырудың маңыздылығына ерекше тоқталды: «Жер қойнауына қатысты мәліметтің бәрін, ең алдымен, жасанды интеллектіні енгізу арқылы жүйелеп, цифрландыру қажет», – деді ол. Бұл шешім деректерді бір орталықтан басқаруға, олардың дұрыстығын қамтамасыз етуге және инвесторлар үшін ашық әрі қолжетімді орта қалыптастыруға мүмкіндік береді.
ИНВЕСТИЦИЯНЫҢ РӨЛІ
Геологиялық барлау саласы ауқымды инвестицияны қажет етеді. Мемлекет басшысы Үкіметке осы мәселені күн тәртібінде ұстап, нақты шаралар қабылдауды тапсырды. Оның айтуынша, халықаралық тәжірибе көрсеткендей, геологияны дамытуға салынған әрбір инвестиция ел экономикасына еселеп қайтады.
РЕФОРМАЛАРДЫ ЖЕДЕЛДЕТУ
Президент жыл соңына дейін геологиялық барлау және жер қойнауын игеру саласындағы реформалардың заңнамалық және практикалық рәсімдерін аяқтау қажеттігін атап өтті. Бұл қадам саланы заманауи талаптарға сай етіп қайта құруға жол ашады.