Түркістан облысында тұрғындардың тұрмыс сапасын арттыру, әлеуметтік инфрақұрылымды дамыту және елді мекендерді заманауи инженерлік желілермен қамту бағытындағы жұмыстар жүйелі түрде жүзеге асырылып келеді. Мемлекет басшысының халықтың әл-ауқатын жақсартуға бағытталған тапсырмалары аясында өңірде табиғи газбен қамту мәселесіне ерекше көңіл бөлінуде. Осы бағыттағы кезекті игі бастама Бәйдібек ауданында жүзеге асырылып, аудан аумағындағы Ағыбет ауылдық округіне қарасты Жұлдыз елді мекеніне табиғи газ берілді.
Аталған маңызды оқиғаға орай елді мекенде салтанатты іс-шара ұйымдастырылып, тұрғындар көптен күткен қуанышқа кенелді. Салтанатты шараға Бәйдібек ауданы әкімінің міндетін атқарушы Нұрпейіс Ақбаев қатысып, ауыл тұрғындарын табиғи газдың қосылуымен құттықтады. Ол өз сөзінде бұл бастама Мемлекет басшысының ел тұрғындарының өмір сүру сапасын арттыруға бағытталған әлеуметтік саясатының нақты нәтижесі екенін атап өтті.
– Табиғи газдың елді мекендерге жеткізілуі – тұрғындардың тұрмысын жеңілдетіп қана қоймай, экологиялық ахуалды жақсартуға, ауылдардың әлеуметтік-экономикалық дамуына серпін беретін маңызды қадам. Жұлдыз елді мекенінің көгілдір отынға қосылуы – ауданымыз үшін үлкен жетістік. Алдағы уақытта да халықтың игілігі жолындағы жұмыстар жүйелі түрде жалғасын табады, – деді Нұрпейіс Ақбаев.
Салтанатты шараға сондай-ақ Түркістан облысының Энергетика және тұрғын үй-коммуналдық шаруашылық басқармасы басшысының орынбасары Роза Сариева, аудан әкімдігінің жауапты сала өкілдері, жергілікті тұрғындар, жобаны жүзеге асырған мердігер мекеме өкілдері мен «QazaqGaz Aimaq» акционерлік қоғамының Түркістан өңірлік филиалының мамандары қатысты. Қонақтар тұрғындарды құттықтап, табиғи газдың ауыл өміріндегі маңыздылығына тоқталды.
Жобаны жүзеге асырған мердігер ұйым – «KazBuildCo» жауапкершілігі шектеулі серіктестігі. Құрылыс жұмыстары бекітілген жобаға сәйкес жүргізіліп, барлық техникалық және қауіпсіздік талаптары сақталған. Жобаның аясында жалпы ұзындығы 10,7 шақырымды құрайтын газ құбыры тартылды. Нәтижесінде Жұлдыз елді мекенінің тұрғындары көгілдір отынның игілігін көріп, тұрмыстық қажеттіліктерін табиғи газ арқылы өтеу мүмкіндігіне ие болды.
Аталған жобаның іске асырылуы Бәйдібек ауданындағы газдандыру деңгейін едәуір арттырды. Қазіргі таңда аудандағы 50 елді мекеннің 39-ы немесе 78 пайызы табиғи газбен қамтылған. Ал халық саны бойынша есептегенде, 48 221 тұрғынның 43 778-і, яғни 90,8 пайызы көгілдір отынға қол жеткізді. Бұл көрсеткіш аудан үшін ғана емес, жалпы өңірлік деңгейде де жоғары нәтиже болып саналады.
Бәйдібек ауданында табиғи газбен қамту жұмыстарын толық аяқтау бағытында жүйелі шаралар қабылдануда. Атап айтқанда, биыл аудан аумағындағы тағы 8 елді мекенді газдандыру бойынша құрылыс жұмыстары жүргізілуде. Олар – Ақжар, Қаратас, Тұрақты, Алмалы, Қошқарата, Кеңсай, Ақтас және Шұқыршақ елді мекендері. Қазіргі таңда аталған жобалар жоспарға сәйкес кезең-кезеңімен жүзеге асырылып жатыр.
Аталған елді мекендердегі газдандыру жұмыстары толық аяқталып, жобалар пайдалануға берілген жағдайда, Бәйдібек ауданы 100 пайыз табиғи газбен қамтылатын болады. Бұл аудан тұрғындарының өмір сүру сапасын арттырып қана қоймай, отынға кететін шығынды азайтуға, экологиялық ахуалды жақсартуға және ауылдық жерлердің әлеуметтік-экономикалық дамуына оң әсерін тигізеді.
Табиғи газдың ауылдарға жеткізілуі қатты отынды пайдаланудан бас тартуға мүмкіндік беріп, қоршаған ортаға шығатын зиянды қалдықтардың көлемін азайтады. Сонымен қатар көгілдір отынның қолжетімділігі тұрғындардың тұрмыстық жағдайын жеңілдетіп, әсіресе қыс мезгілінде жылыту мәселесін тиімді шешуге жол ашады.
Бәйдібек ауданында жүзеге асырылып жатқан газдандыру жобалары Мемлекет басшысының тапсырмаларына және Үкімет бекіткен стратегиялық құжаттарға сәйкес іске асуда. Бұл жұмыстар Түркістан облысының әлеуметтік инфрақұрылымын дамытуға, ауылдық аумақтардың тартымдылығын арттыруға және халықтың әл-ауқатын жақсартуға бағытталған кешенді саясаттың бір бөлігі болып табылады.
Жалпы алғанда, Жұлдыз елді мекенінің табиғи газға қосылуы – өңірде атқарылып жатқан ауқымды инфрақұрылымдық жобалардың айқын көрінісі. Алдағы уақытта да Түркістан облысында елді мекендерді газдандыру, инженерлік инфрақұрылымды жаңғырту және тұрғындарға қолайлы өмір сүру ортасын қалыптастыру бағытындағы жұмыстар жалғасын табатын болады.