Қазіргі таңда қоғамдық келісімді сақтау, этносаралық татулықты нығайту және әлеуметтік шиеленістердің алдын алу мемлекеттік саясаттың маңызды бағыттарының біріне айналып отыр. Бұл міндеттерді жүзеге асыруда Қазақстан халқы Ассамблеясы жанындағы қоғамдық құрылымдардың рөлі ерекше. Солардың бірі – Медиация кеңестері. Олар қоғамдағы дауларды сотқа жеткізбей шешуге, өзара түсіністік мәдениетін қалыптастыруға және қоғамдық тұрақтылықты нығайтуға ықпал ететін маңызды институт ретінде қалыптасып келеді.
Түркістан облысында да медиация институтын дамытуға ерекше көңіл бөлінуде. Өңірде қоғамдық келісімді сақтау, этносаралық қарым-қатынасты нығайту және жанжалдардың алдын алу бағытындағы жұмыстар жүйелі түрде жүргізіліп келеді. Бұл жұмыстар Қазақстан халқы Ассамблеясының қызметімен тығыз сабақтасып, азаматтық қоғам институттарының әлеуетін арттыруға қызмет етуде.
Осы мақсатта Түркістан қаласындағы Достық үйінде Түркістан облыстық Қазақстан халқы Ассамблеясы жанындағы Медиация кеңесінің екінші тоқсандық отырысы өтті. Басқосуда кеңестің ағымдағы қызметі қорытындыланып, алдағы кезеңге арналған жұмыс бағыттары талқыланды.
Жиынды Түркістан облыстық ҚХА жанындағы Медиация кеңесінің төрағасы Бақытжан Бейсембаев жүргізді. Кездесу барысында кеңестің 2026 жылға арналған жұмыс жоспары қаралып, қатысушылардың ұсыныстары негізінде нақтыланып, бекітілді. Бұл құжат алдағы уақытта өңірдегі медиация қызметін жетілдіруге, қоғамдық келісімді нығайтуға және дау-дамайлардың алдын алу жұмыстарын күшейтуге бағытталған маңызды бағдар ретінде айқындалды.
Отырыс барысында Түркістан облыстық қоғамдық даму басқармасы «Қоғамдық келісім» коммуналдық мемлекеттік мекемесі басшысының орынбасары Ерназар Баетов, кәсіби медиатор Батырхан Сансызбаев және қоғамдық медиатор Бақытжан Әшірбаев баяндама жасап, өңірдегі медиация институтының даму барысына тоқталды. Олар қоғамдағы дау-жанжалдарды бейбіт жолмен реттеудің маңызы, этносаралық келісімді нығайтудағы медиацияның орны және татуластыру рәсімдерінің тиімділігі жөнінде пікір білдірді.
Жиынға қатысқан «Ынтымақ» этномәдени бірлестігінің төрағасы Гүлмира Наурызбаева да қоғамдық келісімді сақтау бағытындағы жұмыстарға тоқталып, этномәдени бірлестіктер мен медиация құрылымдарының өзара ынтымақтастығын одан әрі дамыту жөніндегі ұсыныстарын жеткізді. Қатысушылар өңірдегі тұрақтылықты сақтауда қоғамдық ұйымдардың, этномәдени бірлестіктердің және медиация институттарының өзара ықпалдастығы маңызды екенін атап өтті.
Бүгінде Түркістан облыстық ҚХА жанындағы Медиация кеңесі өңірдегі қоғамдық келісім саясатын іске асыруға белсенді атсалысып келеді. Кеңес құрамында 19 мүше жұмыс істейді. Ал облыс аумағында барлығы 70 Медиация кеңесі қызмет көрсетуде. Оның ішінде облыстық деңгейде – 1, қалалық деңгейде – 3, аудандық деңгейде – 14, ауылдық округтерде – 42 және этномәдени бірлестіктер жанында 11 Медиация кеңесі жұмыс істейді.
Бұл көрсеткіштер медиация институтының облыс көлемінде кеңінен дамып келе жатқанын аңғартады. Медиация кеңестерінің жұмысы тек дау-дамайларды шешумен ғана шектелмейді. Олар тұрғындар арасында құқықтық мәдениетті қалыптастыруға, өзара құрмет пен жауапкершілік қағидаттарын дәріптеуге, қоғамдағы келісім мен тұрақтылықты нығайтуға да үлес қосуда.
Өңірде қазіргі таңда 103 кәсіби және қоғамдық медиатор қызмет атқарады. Сонымен қатар Түркістан облыстық ҚХА жанында төрт Медиация орталығы жұмыс істейді. Бұл орталықтар азаматтарға құқықтық және консультативтік көмек көрсетіп, туындаған дауларды сотқа дейінгі тәртіппен шешуге мүмкіндік беруде.
Медиация институтының тиімділігі нақты көрсеткіштерден де көрінеді. 2026 жылдың басынан бері этнос өкілдерінің қатысуымен тіркелген 20 құқық бұзушылық фактісінің 14-і медиация рәсімдері арқылы оң шешімін тапқан. Бұл қоғамдағы келіспеушіліктерді өршітпей, өзара түсіністік пен келісім негізінде реттеудің тиімді жолы екенін дәлелдейді.
Сонымен қатар жыл басынан бері медиация және қоғамдық келісім бағытында 60 түрлі іс-шара ұйымдастырылып, оларға 2600-ге жуық тұрғын қатысқан. Бұл кездесулер, дөңгелек үстелдер, семинарлар мен түсіндіру жұмыстары тұрғындардың құқықтық сауаттылығын арттыруға, қоғамдық келісім мәдениетін қалыптастыруға және азаматтық жауапкершілікті күшейтуге бағытталған.
Медиация – тек құқықтық құрал ғана емес, ол қоғамдағы сенім мен өзара құрмет мәдениетін қалыптастыратын маңызды қоғамдық институт. Сондықтан Қазақстан халқы Ассамблеясы жанындағы Медиация кеңестерінің қызметі қоғамдық тұрақтылықты қамтамасыз етудің маңызды тетіктерінің бірі болып қала береді.
Түркістан облысында қоғамдық келісімді сақтау, этносаралық татулықты нығайту және азаматтық қоғам институттарының әлеуетін арттыру бағытындағы жұмыстар алдағы уақытта да жалғасын табады. Бұл ретте Медиация кеңесінің қызметі қоғамдағы бірлік пен тұрақтылықты нығайтуға, дау-дамайларды өркениетті жолмен шешуге және азаматтар арасындағы өзара түсіністікті дамытуға маңызды үлес қоса бермек.