Мемлекет басшысы Қасым-Жомарт Тоқаев Парламенттің алдағы реформаларына қатысты үндеу жасады, деп хабарлайды Kemelnews.kz ақпарат агенттігі Ақорда баспасөз қызметіне сілтеме жасап. Президент өз сөзінде бұл бастама еліміздің саяси жүйесін жаңғыртуға және демократиялық институттарды одан әрі нығайтуға бағытталғанын атап өтті.
Президенттің айтуынша, бұл – әлемдік тәжірибеде кеңінен тараған парламенттік рәсім, сондықтан Қазақстан да саяси тұрақтылық пен сабақтастық қағидатын сақтай отырып, реформаларды кезең-кезеңімен жүзеге асырады. Тоқаевтың мәлімдеуінше, Мәжілістің қазіргі құрамы барлық заңдық рәсімдер толық аяқталғанға дейін өз қызметін жалғастыра береді. Ал Сенат депутаттары жалпыұлттық референдумның қорытындысы шығып, жаңа Парламент сайлауы өткенге дейін өз міндеттерін үздіксіз атқарады.
Бұл аралық кезеңде саяси партияларға бәсекелі сайлау науқанына дайындалуға және өз бағдарламаларын пысықтауға мүмкіндік беріледі. Президент атап өткендей, мұндай тәсіл саяси жүйенің тұрақтылығын сақтай отырып, жаңа саяси мәдениетті қалыптастыруға ықпал етеді.
Қасым-Жомарт Тоқаев депутаттардың мемлекетшіл көзқарас танытып, бұл процеске жоғары жауапкершілікпен және түсіністікпен қарайтынына сенім білдірді. Оның сөзінше, жүргізіліп жатқан реформалардың түпкі мақсаты – Қазақстанның біртұтас институционалды жүйесін жетілдіру және билік тармақтарының өзара теңгерімін қамтамасыз ету.
Мемлекет басшысы сондай-ақ қоғамда туындауы мүмкін «неге Парламенттік реформа ерте жарияланды?» деген сұраққа да нақты жауап берді:
«Мен еліміздің және халқымыздың тағдырына қатысты кез келген мәселе бойынша тек ашық саясат жүргізу қажет деп санаймын. Мұндай ауқымды реформаны қоғамнан құпия ұстауға болмайды», – деді Президент.
Ол тағдырлы мәселелер бойынша қоғаммен ашық диалог орнатудың және халықпен бірлесе әрекет етудің маңыздылығын ерекше атап өтті. Президенттің пікірінше, тек осындай әділ әрі ашық саясаттың арқасында Қазақстан әділетті және қуатты мемлекет құру жолында ілгері қадам жасай алады.
«Баршаңызға амандық, табыс тілеймін. Қазақстанымыз мәңгі жасай берсін, болашағымыз жарқын болсын!» – деп қорытындылады өз сөзін Мемлекет басшысы.
Бұл үндеу – елдің саяси жаңғыруының жаңа кезеңін айқындаған тарихи мәлімдеме. Президенттің бастамалары қоғамды біріктіріп, ел дамуының жаңа бағытын айқындайтын стратегиялық қадам болып отыр.